Իսրայելը լրացուցիչ զորքեր է ուղարկում Լիբանանի հարավ

Իսրայելական բանակը լրացուցիչ դիվիզիա է ուղարկում Լիբանանի հարավում ցամաքային պատերազմին մասնակցելու համար, գրում է CNN-ը։ Իսրայելական զորամիավորումների թիվը դասակարգված է, սակայն սովորաբար դիվիզիան բաղկացած է առնվազն 10,000 զինվորից։

Այսքան մեծ թվով զինվորների ավելացումը տեղի է ունենում՝ չնայած Իսրայելի այն պնդումներին, որ իր գործողությունը Լիբանանում «սահմանափակ է, տեղային ու թիրախավորված»։ Իսրայելի պաշտպանության ուժերը տասնյակ գյուղերի Լիբանանի քաղաքացիներին կոչ են արել հեռանալ իրենց տներից և շարժվել Ավալի գետից հյուսիս, որը գտնվում է Իսրայելի հետ սահմանից մոտ 30 մղոն հեռավորությամբ:

Հաղորդվում է, որ Իսրայելի պաշտպանության բանակի 36-րդ դիվիզիան և լրացուցիչ ուժերը միանում են գործողություններին, որոնք ուղղված են Իրանի կողմից աջակցվող լիբանանյան «Հըզբոլլահ» շարժման դեմ։ Իսրայելի բանակից հայտնում են, որ դիվիզիայի կազմում ընդգրկված են Գոլանիի բրիգադի, 188-րդ զրահատանկային բրիգադի և 6-րդ հետևակային բրիգադի զինծառայողները։ Նրանց ուղեկցում են Իսրայելի ռազմաօդային ուժերը և 282-րդ հրետանային բրիգադը։

Լիբանանի հարավում իսրայելական զորքերի ամբողջական թիվը հայտնի չէ։

Լիբանանում ՄԱԿ-ի ժամանակավոր ուժերի աղբյուրն ասել է, որ իսրայելցի զինվորականները մի քանի ռեյդ են իրականացրել Լիբանան-Իսրայել սահմանին, սակայն լիբանանյան տարածքում չեն մնացել։ Գնահատականը, որ Իսրայելը դեռևս  լայնածավալ ներխուժում չի սկսել, կիսում են լիբանանյան անվտանգության ուժերի երկու այլ բարձրաստիճան աղբյուրներ:

Թարգմանությունը՝ Էմմա Չոբանյանի