Բաքվի ներկայացուցիչը հայտարարել է, թե մի շարք ուժային կենտրոններ զինում են Հայաստանին՝ մղելով ռևանշի

Ադրբեջանի պետական ​​անվտանգության ծառայության ղեկավար, Գերիների, անհետ կորածների, պատանդների հարցերով պետական ​​հանձնաժողովի նախագահ Ալի Նագիևը «Անհետ կորածների խնդրի լուծում. աջակցում ենք ճշմարտությունն իմանալու ընտանիքների իրավունքին» համաժողովին ժամանակ ունեցած ելույթում հայտարարել է, թե հետպատերազմյան շրջանում «Ադրբեջանը հանդես է գալիս Հարավային Կովկասում խաղաղության, բարիդրացիության սկզբունքներով համակեցության, տրանսպորտային և տնտեսական կապերի վերականգնման օգտին»։

Նա նաև ասել է, թե մի շարք համաշխարհային ուժային կենտրոններ, իբր, «ներկայում շահագրգռված են տարածաշրջանում լարվածության սրմամբ, այդ թվում՝ ռևանշիզմի և անջատողականության հրահրմամբ, զինում են Հայաստանին և բացահայտ աջակցում»։

«Նման ուժերը, կարծես, չեն մտածում այս տարածաշրջանում զինված հակամարտությունների հետևանքով զոհված, փախստական դարձած, ներքին տեղահանված և անհետ կորած հարյուր հազարավոր մարդկանց վիճակի մասին»,- ասել է Նագիևը։

Ադրբեջանցի պաշտոնյան նշել է, թե Բաքուն, միջազգային իրավունքի նորմերին ու սկզբունքներին համապատասխան, ձգտում է բոլոր պետությունների հետ փոխշահավետ համագործակցության սոցիալ-տնտեսական, քաղաքական, հումանիտար և այլ ոլորտներում։

«Նույն սկզբունքների հիման վրա Ադրբեջանը պատրաստ է որքան հնարավոր է շուտ խաղաղության պայմանագիր կնքել Հայաստանի հետ։ Դրա համար պաշտոնական Երևանը պետք է փոփոխություններ կատարի Սահմանադրությունում և այլ օրենսդրական ակտերում, որոնք Ադրբեջանի նկատմամբ նախատեսում են տարածքային պահանջներ։ Խաղաղության պայմանագիրը պետք է ամբողջությամբ բացառի տարածքային պահանջների կրկնակի ներկայացումը»,- հայտարարել է Նագիևը։

Թարգմանությունը՝ Էմմա Չոբանյանի