ԱՄՆ-ում տեղի է ունեցել Հարիսի և Թրամփի առաջադրած փոխնախագահի թեկնածուների բանավեճը

ԱՄՆ-ում տեղի է ունեցել փոխնախագահի թեկնածուների՝ Մինեսոտայի դեմոկրատ նահանգապետ Թիմ Ուոլցի և Օհայոյից հանրապետական սենատոր Ջեյ Դի Վենսի հեռուստաբանավեճը, գրում է Current time-ը։

Ըստ փորձագետների՝ սա, այն, ամենայն հավանականությամբ, նախընտրական քարոզարշավի վերջին կարևոր իրադարձությունն էր և վերջին հնարավորությունը երկու կուսակցությունների ներկայացուցիչների համար՝ խոսելու բազմամիլիոն հեռուստալսարանի առջև։

Բանավեճը տևել է ավելի քան մեկուկես ժամ, փոխնախագահի թեկնածուները շոշափել են տարբեր թեմաներ՝ հակամարտությունը Մերձավոր Արևելքում, անօրինական միգրացիան, գլոբալ տաքացումը, բնակարանների դեֆիցիտը, զենքի տիրապետումը, գնաճը, կանանց վերարտադրողական իրավունքները, դեղորայքի բարձր արժեքը, ԱՄՆ-ում ժողովրդավարության սպառնալիքները և այլն։

Ուկրաինա ռուսական ներխուժման թեման չի բարձրացվել։ Բանավեճի ընթացքում հնչած առաջին հարցը եղել է՝ արդյո՞ք թեկնածուները պաշտպանում են Իսրայելի կողմից Իրանին կանխարգելիչ հարվածներ հասցնելու գաղափարը: Բանավեճի երկու մասնակիցներն էլ խուսափել են պատասխանել այս հարցին։

Թեկնածուները բանավեճի ընթացքում մշտապես վերադարձել են այն թեզերին, որոնք, հարցումների համաձայն, իրենց բերում են ամենաշատ միավորներն ընտրողների շրջանում։ Մասնավորապես, Ջեյ Դի Վենսը երկրում խնդիրների մեծ մասի մեղքը բարդել է անօրինական միգրատների վրա, ըստ նրա՝ միլիոնավոր մարդիկ անվերահսկելի կերպով հատել են ԱՄՆ սահմանը, մինչդեռ Քամալա Հարիսը Բայդենի վարչակազմում պատասխանատու է սահմանների անվտանգության համար։

Թիմ Ուոլզն էլ դատապարտել է Դոնալդ Թրամփին և հանրապետականներին՝ կանանց աբորտի իրավունքը խլելու փորձի համար։

Միաժամանակ, Վենսը խուսափել է ուղղակիորեն պատասխանել Թիմ Ուոլզի հարցին՝ արդյո՞ք Դոնալդ Թրամփը պարտվել է 2020 թվականի նախագահական ընտրություններում, ասելով, որ նայում է ապագային: Նրա խոսքով՝ սոցիալական ցանցերում գրաքննությունը և պաշտոնական քաղաքականության հետ չհամաձայնողների ձայնը խլացնելու փորձերն ամենամեծ վտանգն են ներկայացնում ամերիկյան ժողովրդավարության համար։

«Սա սպանիչ հրաժարում է պատասխանից»,- ասել է փոխնախագահի դեմոկրատ թեկնածուն։

Բանավեճին առաջին արձագանքը զուսպ է։ Մեկնաբանները հիմնականում համաձայն են, որ հանրապետական ​​թեկնածուն տեսախցիկների առջև ավելի վստահ տեսք է ունեցել, քան իր մրցակիցը։ «Campaign for Progressive Change» խմբի ղեկավար Ադամ Գրինը The New York Times-ին ասել է, որ Վենսը «հանգիստ էր և կարգապահ»: Սա, նրա խոսքով, հիշեցում է դեմոկրատներին, որ Թրամփը կարող է հաղթել:

Միևնույն ժամանակ, նշվում է, որ փոխնախագահների թեկնածուների միջև բանավեճերը, որպես կանոն, չեն ազդում նախագահական ընտրությունների ելքի վրա։ Մասնակիցների հիմնական նպատակն է չվնասել իրենց նախագահի թեկնածուին։ Դիտորդների կարծիքով՝ Թիմ Ուոլզը կատարել է այդ առաջադրանքը։

Թարգմանությունը՝ Էմմա Չոբանյանի