18.07.2026 | 22:57
Երևանի Մուրացանի փողոցում տեղի ունեցած միջադեպի վայրում դի է հայտնաբերվել
Իսրայելի ցամաքային հարձակումը Լիբանանի դեմ անօրինական օկուպացիայի փորձ է․ Թուրքիայի ԱԳՆ
Քաղաքականություն
01.10.2024 | 16:41
Իսրայելի կողմից ցամաքային հարձակման միջոցով Լիբանանի ինքնիշխանության և տարածքային ամբողջականության խախտումն անօրինական օկուպացիայի փորձ է։ Այս հարձակումը պետք է անհապաղ դադարեցվի, իսրայելական զորքերը պետք է դուրս գան լիբանանյան տարածքից։ Այս մասին ասվում է Թուրքիայի ԱԳՆ հայտարարության մեջ, փոխանցում են տեղական լրատվամիջոցները։
«Այս հարձակումը սպառնում է տարածաշրջանում և դրանից դուրս անվտանգությանն ու կայունությանը։ Այս վտանգավոր ներխուժման փորձը, ամենայն հավանականությամբ, կհանգեցնի միգրացիայի նոր ալիքի և առիթ կտա ծայրահեղականներին ամբողջ աշխարհում: Այս իրադարձությունները կազդեն նաև այն երկրների վրա, որոնք քաղաքական աջակցություն և զենք են տրամադրում Իսրայելին»,- նշվում է հայտարարության մեջ։
Անկարան նաև կոչ է արել ՄԱԿ-ին՝ քայլեր ձեռնարկել։
«ՄԱԿ-ի Անվտանգության խորհուրդը պետք է պահպանի միջազգային իրավունքը և անհրաժեշտ միջոցներ ձեռնարկի այս հարձակման դեմ, որն ուղղված է Լիբանանի օկուպացմանը: Իսրայելի կատարած յուրաքանչյուր հանցագործություն նաև հարված է միջազգային իրավունքին և ՄԱԿ-ի կանոնադրությանը։ Հիմնական քայլը, որ պետք է արվի տարածաշրջանում խաղաղությունը վերականգնելու համար, Գազայում անհապաղ և մշտական հրադադարի հասնելն է։ Գազայի հատվածում խաղաղություն հաստատելն ամբողջ մարդկության պարտականությունն է»,- հայտարարել է Թուրքիայի ԱԳՆ-ն։
Թարգմանությունը՝ Էմմա Չոբանյանի
