11.08.2026 | 00:05
Երկրաշարժ Վարդենիս քաղաքից 26 կմ հյուսիս-արևելք
Ղազախստանը ծրագրում է երկրորդ գազատարը կառուցել դեպի Չինաստան․ Bloomberg
Քաղաքականություն
01.10.2024 | 17:00
Ղազախստանը Չինաստանի հետ քննարկում է գազի մատակարարումների ավելացման համար երկրորդ խողովակաշարի կառուցման հարցը, որը կարող է մեծացնել Ռուսաստանի հետ մրցակցությունը չինական շուկայում, գրում է Bloomberg-ը:
«Չնայած Չինաստանում տնտեսական աճի տեմպերի դանդաղելու մասին տեղեկություններին՝ գազի պահանջարկը շարունակում է աճել։ Մենք հույս ունենք կոնսենսուսի հասնել Չինաստան արտահանման ծավալների ավելացման հարցում»,- գործակալությանն ասել է QazaqGaz-ի խորհրդի նախագահ Սանժար Ժարկեշովը:
Նրա խոսքով՝ երկրորդ խողովակաշարը կարող է կառուցվել 2-3 տարվա ընթացքում, իսկ շինարարության մեկնարկի մասին որոշումը սպասվում է այս տարվա վերջին։ Ծրագրի արժեքը կկազմի 3-6 մլրդ դոլար, այն ֆինանսավորելու համար QazaqGaz-ը հաջորդ տարի 1 մլրդ դոլարի եվրոպարտատոմսեր կթողարկի։
Ներկայում Ղազախստանը տարեկան շուրջ 4 միլիարդ խորանարդ մետր գազ է արտահանում Չինաստան, մինչդեռ ներքին սպառումը երկրում կազմում է մոտ 21 միլիարդ խորանարդ մետր։ 2023 թվականին Ղազախստանն ու Չինաստանը երկարաձգեցին արտահանման պայմանագիրը երեք տարով։
Ռուսաստանը Չինաստանին գազ է մատակարարում «Սիբիրի ուժ» խողովակաշարով։ 2024 թվականին մատակարարման ծավալը կկազմի 30 միլիարդ խորանարդ մետր, իսկ 2025-ին այն պետք է հասնի առավելագույնը 38 միլիարդի։
Միաժամանակ, «Գազպրոմը» չինական շուկային վառելիքը վաճառում է զեղչով. հաջորդ տարի Չինաստանը ռուսական գազը կստանա 261 դոլարով՝ հազար խորանարդ մետրի դիմաց, ինչը 35%-ով ցածր է եվրոպական ներկայիս գներից (402 դոլար):
Թարգմանությունը՝ Տաթև Ֆռանգյանի
