09.09.2026 | 10:41
Հրդեհ Քարաբերդում․ այրվել է մոտ 700 հակ անասնակեր
Բայդենը կարող է արագացնել Ուկրաինայի անդամակցությունը ՆԱՏՕ-ին՝ նախքան պաշտոնից հեռանալը․ FT
Քաղաքականություն
01.10.2024 | 15:17
ԱՄՆ նախագահ Ջո Բայդենը կարող է առաջ մղել ՆԱՏՕ-ին անդամակցելու Ուկրաինայի հայտը՝ նախքան 2025 թվականի հունվարին պաշտոնից հեռանալը, գրում է Financial Times (FT) պարբերականը՝ վկայակոչելով իր աղբյուրին, որը տեղեկացված է Բայդենի և Ուկրաինայի նախագահ Վլադիմիր Զելենսկիի վաշինգտոնյան բանակցություններին։
FT-ն պարզաբանում է, որ Ջո Բայդենի՝ որպես ԱՄՆ նախագահի վերջին այցը Եվրոպա կարող է լինել կոնտակտային խմբի երկրների առաջնորդների հանդիպումը Ուկրաինայի հարցով, որը նախատեսված է հոկտեմբերի 12-ին։ Այնուամենայնիվ, ուկրաինացի բարձրաստիճան պաշտոնյան, որի անունը չի նշվում, կարծում է, որ ՆԱՏՕ-ին լիարժեք անդամակցության հարցով բավարար լուծում չի լինի։
«Եթե նույնիսկ ՆԱՏՕ-ի հրավեր ստանանք, դա ոչինչ չի նշանակի։ Դա քաղաքական որոշում է»,- վստահ է նա։
2022 թվականի սեպտեմբերին Ուկրաինայի նախագահ Վլադիմիր Զելենսկին ՆԱՏՕ-ին Կիևի անդամակցության հայտ է ներկայացրել։ 2024 թվականի հունվարին Foreign Policy-ն գրել էր, որ ԱՄՆ-ի և Գերմանիայի իշխանությունները ցանկանում են հետաձգել Ուկրաինայի՝ ՆԱՏՕ-ի անդամակցության հրավերը։ Մայիսին Գերմանիայի կանցլեր Օլաֆ Շոլցը խոստովանել էր, որ Ուկրաինան չի անդամակցի ՆԱՏՕ-ին առաջիկա 30 տարում։
Վաշինգտոն կատարած այցի ընթացքում Զելենսկին ԱՄՆ իշխանություններին ներկայացրել է իր «հաղթական ծրագիրը», որի ամբողջական բովանդակությունը դեռևս հայտնի չէ։ Ըստ ԶԼՄ-ների՝ այն ներառում է մի քանի կետեր, այդ թվում՝ ՆԱՏՕ-ին Ուկրաինայի անդամակցություն կամ նրան անվտանգության երաշխիքների տրամադրում, ինչպես դաշինքի անդամներին:
Թարգմանությունը՝ Տաթև Ֆռանգյանի
