22.06.2026 | 15:19
Ուկրաինան հարձակվել է Վորոնեժի վրա․ հրթիռային հարված է հասցվել պաշտպանական գործարանի․ ՏԵՍԱՆՅՈՒԹ
Հոկտեմբերի 1-ին ԵԽԽՎ-ն կքննարկի Ադրբեջանում մարդու իրավունքների վատթարացող իրավիճակի հարցը
Քաղաքականություն
30.09.2024 | 22:31
Ստրասբուրգում ԵԽԽՎ լիագումար նիստում այսօր հաստատվել է վեհաժողովի աշնանային նստաշրջանի վերջնական օրակարգը, որը տևելու է մինչև հոկտեմբերի 4-ը։ Ադրբեջանական Թուրան գործակալության փոխանցմամբ՝ 81 կողմ, 33 դեմ և 5 ձեռնպահ ձայների հարաբերակցությամբ օրակարգում ընդգրկվել է «Ադրբեջանում մարդու իրավունքների, օրենքի գերակայության և ժողովրդավարության հետ կապված իրավիճակի վատթարացումը» թեմայով դեբատը։
Այն տեղի է ունենալու երեքշաբթի՝ հոկտեմբերի 1-ին, ժամը 16:00-ից մինչև 19:00-ը:
Քննարկման ժամանակ որոշ պատգամավորներ դեմ են արտահայտվել այս հարցի քննարկմանը։ Մասնավորապես, Վրաստանի ներկայացուցիչ Գիվի Միկանաձեն հայտարարել է, թե դեբատները տեղին չեն Ադրբեջանի ներկայացուցիչների բացակայության պայմաններում։Սակայն նրա առաջարկը աջակցություն չի ստացել և Ադրբեջանի վերաբերյալ բանավեճ անցկացնելու որոշումը ընդունվել է ձայների մեծամասնությամբ։
Հունվարի 24-ին ԵԽԽՎ-ն քվեարկությամբ որոշել էր չվավերացնել Ադրբեջանի պատվիրակության լիազորությունները։ Այս որոշմամբ Ադրբեջանի պատվիրակությունն առնվազն մեկ տարով հեռացվել է ԵԽԽՎ-ից և կարող է վերադառնալ իր կանոնադրական պարտավորությունները կատարելու դեպքում։ Ադրբեջանական պատվիրակության նկատմամբ քաղաքական պատժամիջոցներ սահմանող որոշմանը կողմ էր քվեարկել 76, դեմ՝ 10 պատգամավոր, ևս 4 խորհրդարանական ձեռնպահ է մնացել։
Ի պատասխան՝ Բաքուն վերջերս հայտարարել էր, որ ԵԽԽՎ անդամներին, որոնք դեմ են քվեարկել ադրբեջանական պատվիրակության լիազորությունների երկարաձգմանը, արգելվում է մուտք գործել Ադրբեջան։
Թարգմանությունը՝ Էմմա Չոբանյանի
