Թուրքիան հերքում է, թե Բեռլինի հետ համաձայնության է եկել Գերմանիայից թուրքերի զանգվածային արտաքսման հարցով

Թուրքիան հերքել է տեղեկությունները, որ Գերմանիայի հետ միգրացիոն նոր պայմանագիր է ստորագրել, որի համաձայն՝ Բեռլինն ամեն շաբաթ արտաքսելու է հազարավոր թուրքերի, որոնց ապաստանի հայցերը մերժվել են, գրում է Daily Sabah-ը։

«Այն պնդումները, թե Թուրքիան և Գերմանիան կնքել են նոր համաձայնագիր փախստականների հարցով, և 200 փախստական ​​արդեն արտաքսվել է Թուրքիա, անհիմն են»,- ասվում է Թուրքիայի նախագահի աշխատակազմի հաղորդակցության տնօրինության տարածած հաղորդագրությունում։

Թուրքիայի ԱԳՆ-ն ևս հերքել է գերմանական լրատվամիջոցների տեղեկությունները, թե Գերմանիան ծրագրում է Թուրք ուղարկել այդ երեկրի 13,500 քաղաքացիների, որոնք օրինական կեցության թույլտվություն չունեն։

«Նշված զեկույցները չեն պարունակում որևէ պնդում, որ օտարերկրյա ապաստան հայցողները կուղարկվեն Թուրքիա, սակայն որոշ հարթակներ մղում են մանիպուլյացիոն արշավի, որի համաձայն՝ փախստականները կուղարկվեն Թուրքիա։ Թուրքիայի և Գերմանիայի միջև համաձայնություն չկա թուրք քաղաքացիների զանգվածային արտաքսման վերաբերյալ՝ առանց օրինական բնակության թույլտվության»,- ասվում է տնօրինության հայտարարության մեջ։

Անդրադառնալով սոցիալական ցանցերում 200 փախստականների Թուրքիա արտաքսելու մասին հայտարարություններին՝ տնօրինությունը նշել է, որ նկարները պատրաստվել և տարածվել են Գյուլենական շարժման (FETÖ) քարոզչական օգտահաշիվների միջոցով։

Անցյալ շաբաթ մի քանի գերմանական լրատվամիջոցներ գրել էին, որ երկար բանակցություններից հետո Թուրքիան և Գերմանիան համաձայնության են եկել թուրք փախստականներին ավելի արագ արտաքսելու հարցի շուրջ։ Գերմանական Frankfurter Allgemeine Zeitung-ի փոխանցմամբ՝ պայմանավորվածությունը ձեռք է բերվել անցյալ տարվա նոյեմբերին նախագահ Ռեջեփ Թայիփ Էրդողանի՝ Բեռլին կատարած այցի ժամանակ։ Նշվում էր, թե Թուրքիան ընդունելու է շաբաթական մինչև 500 քաղաքացու «հատուկ թռիչքներով»։

Թարգմանությունը՝ Էմմա Չոբանյանի