Քաղաքականություն
26.09.2024 | 19:09
Ռուսաստանը Կատարի միջնորդությամբ 9 երեխայի է փոխանցել Ուկրաինային։ ՌԴ երեխաների իրավունքների հարցերի հանձնակատար Մարիա Լվովա-Բելովան ասել է, որ խմբում 12-ից 17 տարեկան 8 տղա և 17 տարեկան մեկ աղջիկ է։ Նրանցից շատերը Ռուսաստանում եղել են իրենց տատիկների ու պապիկների հետ, գրում է BBC-ի ռուսական ծառայությունը։
Փոխանակմանը մասնակցել է Կատարի դեսպան Ահմեդ բեն Նասեր բեն Ջասիմ ալ-Թանին։
«Երկրի ներկայացուցիչները մասնակցում են ուկրաինական կողմի հետ բանակցություններին, ուղեկցում երեխաներին ու հարազատներին, հոգում են տրանսպորտային և այլ ծախսեր։ Աշխատանքներին մասնակցում են նաև Կարմիր Խաչի միջազգային կոմիտեն, երեխաների տարածաշրջանային օմբուդսմենները, համապատասխան գերատեսչությունների և իրավապահ մարմինների ներկայացուցիչներ»,- ասել է Լվովա-Բելովան։
Մինչ օրս 62 ընտանիքից 80 երեխա վերամիավորվել է Ուկրաինայում և երրորդ երկրներում իրենց հարազատների հետ, իսկ ութ ընտանիքից 13 երեխա վերադարձել է Ռուսաստան։
Թարգմանությունը՝ Տաթև Ֆռանգյանի
