09.09.2026 | 16:31
«Մեր ժամանակների հերոսը» թանկացել է․ 395 հազար դոլար՝ «Դոմինո վիդեո փրոդաքշն»-ին
Պահանջում ենք դադարեցնել Ֆրանսիայի ապակառուցողական գործունեությունը․ Բաքուն՝ ՄԱԿ-ում Մակրոնի ելույթին ի պատասխան
Քաղաքականություն
26.09.2024 | 11:59
Ադրբեջանի ԱԳՆ-ն արձագանքել է ՄԱԿ-ի Գլխավոր վեհաժողովում Ֆրանսիայի նախագահ Էմանուել Մակրոնի ելույթին, որում նա խոսել է Հայաստանի հանդեպ Բաքվի սպառնալիքների մասին։
«Ֆրանսիայի նախագահ Էմանուել Մակրոնի տեսակետները սեպտեմբերի 25-ին ՄԱԿ-ի Գլխավոր վեհաժողովում ելույթի ժամանակ, որ «Ֆրանսիան ամուր կանգնած է Հայաստանի կողքին՝ ընդդեմ Ադրբեջանի ճնշումների և տարածքային նկրտումների», Ֆրանսիայի կողմնակալ հայամետ մոտեցման ևս մեկ օրինակ են՝ ուղղված ինչպես մեր երկրին, այնպես էլ ընդհանրապես խաղաղության գործընթացին։ Անընդունելի է, որ Ֆրանսիան, որը Հայաստանին ռևանշիզմի է նախապատրաստում և այդ երկիրը լայնորեն զինում, ադրբեջանական կողմին մեղադրում է ճնշման մեջ։ Մենք պահանջում ենք դադարեցնել Ֆրանսիայի ապակառուցողական գործունեությունը մեր տարածաշրջանում, որի արտաքին քաղաքականությունն աշխարհի շատ երկրների նկատմամբ ձախողվել է»,- ասել է Ադրբեջանի ԱԳՆ խոսնակ Այխան Հաջիզադեն։
Հավելենք՝ Մակրոնն իր ելույթում հայտարարել էր, որ Ֆրանսիան ամուր կանգնած է Հայաստանի կողքին։
«Հայաստանը, որի կողքին Ֆրանսիան ամուր կանգնած է՝ ընդդեմ Ադրբեջանի ճնշման և նրա տարածքային նկրտումների, միջազգային հանրությունը պետք է այնտեղ լինի, որպեսզի խաղաղ բանակցությունները հաջողությամբ ավարտվեն, և որ միջազգային ճանաչված սահմանները պահպանվեն»,- ՄԱԿ-ի ամբիոնից հայտարարել է Ֆրանսիայի նախագահը։
Թարգմանությունը՝ Էմմա Չոբանյանի
