15.12.2024 | 21:00
Այսօր երիտասարդներն ավելի ինքնուրույն են, բայց պակաս տեղեկացված. ապաքաղաքական զրույց Անուշ Ասլիբեկյանի հետ․ ՏԵՍԱՆՅՈՒԹ
Պուտինը հայտարարել է՝ ինչը կլինի ՌԴ-ի միջուկային պատասխանի հիմք
Քաղաքականություն
26.09.2024 | 11:55
ՌԴ նախագահ Վլադիմիր Պուտինը, որն ավելի վաղ հայտարարել էր ռուսական միջուկային դոկտրինում փոփոխություններ կատարելու մասին, խոսել է նախատեսվող փոփոխությունների մասին։ Մոսկվան ընդլայնում է պատասխան հարվածի հիմքերի ցանկը. Ռուսաստանի ինքնիշխանությանը և սովորական սպառազինություններին սպառնացող «կրիտիկական վտանգը» միջուկային պատասխանի հիմք կլինեն, հայտարարել է ՌԴ նախագահը, փոխանցում է BBC-ի ռուսական ծառայությունը։
Պուտինն ասել է, որ առաջարկվում է մի շարք պարզաբանումներ մտցնել երկրի միջուկային դոկտրինում՝ միջուկային զենքի կիրառման պայմանների որոշման առումով։
Այս տարվա հուլիսի 7-ին, ելույթ ունենալով Սանկտ Պետերբուրգի տնտեսական ֆորումում, Պուտինը չէր բացառել միջուկային դոկտրինի փոփոխությունը՝ շեշտելով, որ այժմ միջուկային զենքի կիրառման մասին «նույնիսկ մտածելու» կարիք չկա։
Սեպտեմբերի 25-ին Պուտինը ելույթ է ունեցել միջուկային զսպման հարցերով ՌԴ Անվտանգության խորհրդի մշտական նիստում։ Կրեմլը հրապարակել է նրա ելույթը, ըստ որի՝ Պուտինը հայտարարել է, որ Ռուսաստանն իրեն իրավունք է վերապահում օգտագործել միջուկային զենք ագրեսիայի ժամանակ, այդ թվում՝ եթե սովորական զենք օգտագործող թշնամին «կրիտիկական վտանգ է ներկայացնում»։
Փաստաթղթի թարմացված տարբերակում Ռուսաստանի դեմ ցանկացած ոչ միջուկային պետության ագրեսիան «միջուկային պետության մասնակցությամբ կամ աջակցությամբ» առաջարկվում է դիտարկել որպես նրանց համատեղ հարձակում Ռուսաստանի վրա։ Պուտինի խոսքով՝ միջուկային նորացված դոկտրինի նախագիծը կընդլայնի պետությունների և ռազմական դաշինքների կատեգորիան, որոնց դեմ միջուկային զսպման մեխանիզմ կգործարկվի։
«Ռուսաստանի դեմ օդատիեզերական հարձակման զենքի արձակման մասին հավաստի տեղեկատվությունը կհանգեցնի միջուկային պատասխանի։ Ռուսաստանն իրեն իրավունք է վերապահում միջուկային զենք օգտագործել Բելառուսի դեմ ագրեսիայի դեպքում։ Ռուսաստանը կարող է դիտարկել միջուկային զենքի կիրառումը հրթիռների և անօդաչու թռչող սարքերի զանգվածային արձակման մասին հավաստի տվյալներից հետո»,- նախազգուշացրել է Պուտինը։
Պուտինի խոսքերը հնչում են այն քննարկումների ֆոնին՝ արդյո՞ք Արևմուտքը կարող է թույլ տալ Ուկրաինային հեռահար զենքով հարվածներ հասցնել Ռուսաստանին: Պուտինը նախապես խոստացել էր, որ Մոսկվան կոշտ կարձագանքի նման որոշմանը։ Սեպտեմբերի 12-ին նա հայտարարել էր, որ Կիևին Ռուսաստանի տարածքին հարվածներ հացնելու թույլտվությունը կնշանակի ՆԱՏՕ-ի երկրների անմիջական մասնակցություն Ուկրաինայի պատերազմին։
Թարգմանությունը՝ Տաթև Ֆռանգյանի
