19.07.2026 | 11:32
Ահազանգ է ստացվել, որ Կապան քաղաքի Բաղաբերդ թաղամասում այրվում է տնակ․ ՆԳՆ
Ադրբեջանի ցամաքային սահմանները փակ կմնան․ COVID-ի հատուկ կարանտինային ռեժիմը երկարաձգվել է
Քաղաքականություն
25.09.2024 | 20:37
Ադրբեջանի իշխանությունները կրկին երկարաձգել են երկրում կորոնավիրուսի համավարակով պայմանավորած հատուկ կարանտինային ռեժիմը: Համապատասխան հրամանագիրը ստորագրել է Ադրբեջանի վարչապետ Ալի Ասադովը։
Ըստ փաստաթղթի՝ երկրում հատուկ կարանտինային ռեժիմի տևողությունը երկարացվել է մինչև 2025 թվականի հունվարի 1-ը։
Նշենք, որ հատուկ կարանտինային ռեժիմը նախկինում երկարացվել էր մինչև 2024 թվականի հոկտեմբերի 1-ը։
Ադրբեջանը կորոնավիրուսի համավարակի պատճառով 2020 թվականի մարտից կարանտինային ռեժիմում է, չորս տարի է՝ երկրի ցամաքային սահմանները փակ են։ Չնայած Առողջապահության համաշխարհային կազմակերպությունը հայտարարել է աշխարհում COVID-19-ի համաճարակի ավարտի մասին՝ աշխարհի բոլոր երկրները դուրս են եկել կարանտինային ռեժիմից, Ադրբեջանում այն պարբերաբար երկարաձգվում է, թեև համաճարակի հետ կապված բոլոր սահմանափակումները հանվել են։
Սեպտեմբերի 23-ին, ելույթ ունենալով 7-րդ գումարման խորհրդարանի առաջին նիստում, Ադրբեջանի նախագահ Իլհամ Ալիևը փակ սահմանների պահպանումը բացատրել էր արտաքին սպառնալիքներով։
«Այն, որ վերջին տարիներին մեր ցամաքային սահմանները փակ են մնում, մեզ փրկել է շատ մեծ աղետներից։ Այսօր էլ, երբ սահմանները փակ են մնում, վտանգավոր գործողություններ են իրականացվում, որոնք կասեցվում են։ Ուստի սահմանների պաշտպանությունը մեզ կպաշտպանի արտաքին ռիսկերից»,- հայտարարել էր նա։
Թարգմանությունը՝ Էմմա Չոբանյանի
