07.10.2026 | 12:01
Թրամփը հայտնել է, որ Պուտինի հետ հեռախոսազրույց կունենա Ռուսաստանում ժանտախտի իրավիճակի հետ կապված
Ադրբեջանն ու Թուրքիան ռազմատեխնիկական համագործակցության նոր համաձայնագրեր են ստորագրել
Քաղաքականություն
25.09.2024 | 13:52
Բաքվում անցկացվող ADEX-2024 միջազգային պաշտպանական ցուցահանդեսի շրջանակում Ադրբեջանի ՊՆ ղեկավար Զաքիր Հասանովը հանդիպել է թուրք պաշտոնակից Յաշար Գյուլերի հետ, գրում են ադրբեջանական լրատվամիջոցները։
Ըստ ադրբեջանական ՊՆ-ի՝ ընդլայնված կազմով հանդիպմանը մասնակցել են Ադրբեջանի ԳՇ պետ Քերիմ Վելիևը, ՊՆ փոխնախարար Ագիլ Գուրբանովը, պաշտպանության փոխնախարարի պաշտոնակատար, ռազմաօդային ուժերի հրամանատար Նամիգ Իսլամզադեն, պաշտպանության նախարարի խորհրդական, գեներալ-գնդապետ Բախտիյար Էրսայը, որը թուրքական բանակի սպա է, թուրքական կողմից՝ Թուրքիայի ԳՇ պետ Մեթին Գյուրաքը, ռազմածովային ուժերի հրամանատար Էրջումենտ Թաթլըօղլուն, ցամաքային զորքերի հրամանատար, գեներալ Սելջուկ Բայրաքթարօղլուն, ռազմաօդային ուժերի հրամանատար, բանակի գեներալ Զիյա Ջեմալ Քադըօղլուն, Ադրբեջանում Թուրքիայի դեսպան Ջահիտ Բաղջին և այլ պաշտոնյաներ։
Հանդիպմանը նշվել է, որ ադրբեջանա-թուրքական հարաբերությունները հիմնված են բարեկամության, եղբայրության և ռազմավարական դաշնակցության վրա։ Գոհունակություն է արտահայտվել ռազմական, ռազմատեխնիկական, ռազմակրթական և ռազմաբժշկական ոլորտներում երկկողմ համագործակցության ներկա վիճակի կապակցությամբ, մտքեր են փոխանակվել երկկողմ հարաբերությունների զարգացման հեռանկարների, տարածաշրջանային անվտանգության և այլ հարցերի շուրջ։
Հասանովը հանդիպել է նաև Թուրքիայի նախագահի աշխատակազմի պաշտպանական արդյունաբերության կոմիտեի նախագահ Հալուք Գյորգյունի գլխավորած պատվիրակությանը։ Թուրքիայում մի քանի առաջատար ռազմարդյունաբերական ընկերությունների ղեկավարների մասնակցությամբ հանդիպմանը վստահություն է հայտնվել, որ «համատեղ ռազմատեխնիկական նախագծերն է՛լ ավելի կբարձրացնեն երկու եղբայրական երկրների պաշտպանունակությունը»։ Կողմերը քննարկել են նաև համագործակցության նոր հեռանկարները։
Հանդիպումների ժամանակ հատկապես նշվել է տեխնոլոգիական նորարարությունների կիրառմամբ համատեղ արտադրության ավելացման կարևորությունը։ Դրանց արդյունքում ստորագրվել են մի շարք պայմանագրեր ռազմատեխնիկական համագործակցության վերաբերյալ։
Թարգմանությունը ՝Էմմա Չոբանյանի
