Սոլովյովն ընդդեմ Պուտինի․ պրոպագանդիստը «կոնկրետ որոշումների» կոչ է արել, նույնիսկ եթե դա պահանջում է «գերագույն հրամանատարի հրաժարականը»

Ռուսական պետական «Ռոսիա-1» հեռուստաալիքով անսպասելի հայտարարություն է հնչել։ Այսպես, հեռուստահաղորդավար Վլադիմիր Սոլովյովը, որը Կրեմլի քարոզիչներից է, կոչ է արել անցնել «կոնկրետ որոշումների», նույնիսկ եթե դա պահանջում է «գերագույն հրամանատարի հրաժարականը», գրում է Top new-ը։

Սոլովյովը հայտարարել է հետևյալը. «Մեղավորներին բանտարկելը բավական չէ։ Մենք նաև պետք է նշանակենք նրանց, ովքեր հասկանում են, թե ինչպես դա անել արդյունավետ, արագ և հստակ»:

Միաժամանակ, նա նշել է, որ դրա համար նշանակություն չունի, թե որ նախարարությունում և ինչպես են կոչվելու այդ մարդիկ։

«Ինձ համար կարևոր չէ, թե ինչ գույն է կատուն, կարևոր է, որ նա բռնի մկներին: Ուստի անցնենք կոնկրետ լուծումներին։ Եթե դրա համար անհրաժեշտ լինի գերագույն հրամանատարի հրաժարականը… դե…»,- ասել է Վլադիմիր Սոլովյովը։

Այդ պահին հետին պլանում լսվում են տաղավարում գտնվող հյուրերի բացականչությունները։

«Ինչպես ասում են իմ ընկերները՝ ես հասկանում եմ, որ նման որոշումներ կայացնելն իմ աշխատավարձի չափով չէ։ Բայց եկեք վերցնենք այն ամենը, ինչ ունեցել ենք մեծ դարաշրջանների փորձից: Եվ լուծենք այն մեթոդներով, որոնք անհրաժեշտ են այստեղ և հիմա»,- հավելել է հեռուստահաղորդավարը։

Բացի այդ, եթերում պրոդյուսեր Տիգրան Քեոսայանը հայտարարել է, որ պատերազմն ընթանում է «ըստ պլանի, և այդ պլանը լավն է, եթե նայենք, թե ինչ է տեղի ունենում շփման գծում»։ Իսկ Սոլովյովն ընդհատել է նրան՝ հարցնելով՝ արդյո՞ք պլանավորված էր Կուրսկ «նացիստական զորքերի» ներխուժումը։

«Մենք ասում ենք՝ ամեն ինչ ըստ պլանի է գնում։ Կներես, ՌԴ Կուրսկի մարզ նացիստական զորքեր են ներխուժել։ Մենք նման պլան չունեինք։ Շնորհիվ մեր մարդկանց հերոսությունների հաջողվել է նրանց կանգնեցնել, նրանք ձգտում էին գրավել Կուրսկի ԱԷԿ-ը»,- հայտարարել է Սոլովյովը։

Թարգմանությունը՝ Տաթև Ֆռանգյանի