23.06.2026 | 00:27
Ամենամեծ էկրանով ստադիոնը, չսպասված երկրպագուներ. ԱԱ-2026-ի Բելգիա-Իրան խաղը` Factor TV-ի աչքերով
Թուրքիայի և Իրանի նախագահները Նյու Յորքում տարածաշրջանային ու գլոբալ զարգացումներն են քննարկել
Քաղաքականություն
24.09.2024 | 11:23
Թուրքիայի նախագահ Ռեջեփ Թայիփ Էրդողանը Նյու Յորքում ՄԱԿ-ի Գլխավոր վեհաժողովի 79-րդ նստաշրջանի շրջանակում Թուրքական տանը հանդիպել է Իրանի նախագահ Մասուդ Փեզեշքիանին։ Թուրքական կողմի հաղորդմամբ՝ հանդիպմանը քննարկվել են Թուրքիայի և Իրանի երկկողմ հարաբերությունները, Իսրայելի հարձակումները Պաղեստինի և Լիբանանի վրա, ինչպես նաև տարածաշրջանային և գլոբալ զարգացումները։
Նշելով, որ Թուրքիայի և Իրանի միջև պատմամշակութային կապերը միշտ դրական ազդեցություն են ունեցել երկկողմ հարաբերությունների վրա, և որ առաջիկայում կգնահատվեն երկու երկրների շահերին համապատասխան համագործակցության հնարավորությունները՝ Էրդողանը վստահություն է հայտնել, որ կապերը կզարգանան և կամրապնդվեն բոլոր ոլորտներում։
Մատնանշելով խաղաղությանը ծառայող միջոցներ ձեռնարկելու կարևորությունը՝ ի պատասխան Իսրայելի ագրեսիայի, որը սպառնում է տարածաշրջանում խաղաղությանը և կայունությանը, Էրդողանն ասել է, որ միջազգային հանրությունը պետք է իր ձայնն ավելի բարձրացնի միջազգային իրավունքի, դիվանագիտության և մարդու իրավունքների հիման վրա, որպեսզի որքան հնարավոր է՝ շուտ դադարեցվի բռնությունը, որն Իսրայելն իրականացնում է պաղեստինյան և լիբանանյան տարածքներում։
Թուրքիայի նախագահը նաև հավելել է, որ Անկարան մեծացնում է ջանքերը՝ հումանիտար օգնություն ցուցաբերելու խաղաղ բնակիչներին պաղեստինյան տարածքներում, հատկապես Գազայի հատվածում, որտեղ իսրայելական ջարդեր են տեղի ունենում։
Թարգմանությունը՝Էմմա Չոբանյանի
