Իրանի Իսլամական հեղափոխության պահապանների կորպուսի անդամներին արգելել են օգտվել կապի միջոցներից. Reuters

Իրանի Իսլամական հեղափոխության պահապանների կորպուսը (ԻՀՊԿ՝ Զինված ուժերի էլիտար ստորաբաժանում) արգելել է իր անդամներին կապի սարքավորումներ օգտագործել Լիբանանում բազմաթիվ սարքերի պայթյուններից հետո, հայտնում է Reuters-ը՝ հղում անելով Իրանի հետախուզական ծառայությունների աղբյուրներին։

Իրանի անվտանգության ուժերի էլիտար ստորաբաժանումը սկսել է իր անդամների կողմից օգտագործվող բոլոր կապի և այլ սարքերի ամբողջական ստուգում: ԻՀՊԿ-ն հատկապես անհանգստացած է իր հրթիռային և միջուկային օբյեկտների անվտանգությամբ այն բանից հետո, երբ լիբանանյան «Հըզբոլլահ» զինված խմբավորման հազարավոր անդամներ, որոնց նա աջակցում է, տուժել են փեյջերների և ռացիաների պայթյուններից, որոնք, ինչպես հաղորդվում է, Իսրայելի գաղտնի գործողության արդյունք են եղել։

Կազմակերպությունն իր բոլոր անդամներին արգելել է հետաքննության ընթացքում կապի ցանկացած միջոց օգտագործել, Reuters-ին հայտնել են Իրանի անվտանգության երկու բարձրաստիճան աղբյուրներ: Դրանցից մեկի համաձայն՝ այդ սարքերի մեծ մասն արտադրվել է երկրի ներսում. տեղական պաշտպանական ընկերությունները մշակել են իրենց գաղտնագրված կապի միջոցները, սակայն որոշ բաղադրիչներ կարող էին մատակարարվել արտասահմանից։

Բացի այդ, նախկինում կապի սարքեր են ներկրվել Չինաստանից և Ռուսաստանից։

Իսլամական հեղափոխության նվաճումները պաշտպանելու գործում ԻՀՊԿ-ի դերն ամրագրված է Իրանի Սահմանադրությամբ: Կորպուսը կատարում է բանակի, ոստիկանության, պետական անվտանգության մարմինների գործառույթները, ակտիվորեն մասնակցում է երկրի քաղաքական և տնտեսական կյանքին։