Քաղաքականություն
20.09.2024 | 12:11
Մոսկվայի կենտրոնում Wildberries-ի գրասենյակի մոտ տեղի ունեցած հրաձգության դեպքով հարուցված քրեական գործով քննիչները մեղադրանք են առաջադրել 33 անձի, այդ թվում՝ Wildberries-ի հիմնադրի ամուսնուն՝ Վլադիսլավ Բակալչուկին։ Մեղադրյալների խափանման միջոցի հարցը կքննվի սեպտեմբերի 20-ին և 21-ին, հայտնում է ՏԱՍՍ-ը։
Քննչական կոմիտեն պնդում է, որ բոլոր մեղադրյալների նկատմամբ խափանման միջոց կընտրվի կալանավորումը։
Սեպտեմբերի 19-ի երեկոյան Մոսկվայի Բասմանի շրջանային դատարանը գործով 6 մեղադրյալի արդեն երկու ամսով կալանավորելու որոշում է կայացրել։ Նրանք կակլանքի տակ կմնան մինչև նոյեմբերի 18-ը։
Forbes-ը, վկայակոչելով Բակալչուկի փաստաբաններին, գրում է, որ նրան մեղադրանք է առաջադրվել սպանության (ՔՕ 105-րդ հոդվածի 2-րդ մասի), սպանության փորձի (ՔՕ 30-րդ հոդվածի 3-րդ մասի 105-րդ հոդվածի 1-ին մասի), իրավապահ մարմինների աշխատակցի նկատմամբ սպանության փորձի (317-րդ հոդվածի) հատկանիշներով։
Բակալչուկը կալանավորվել է 48 ժամով։ Նա չի ընդունում մեղադրանքները և ակնկալում է, որ հետաքննությունը կուսումնասիրի ներկայացված փաստաթղթերն ու ազատ կարձակի իրեն։
Հիշեցնենք, որ միջադեպը տեղի էր ունեցել սեպտեմբերի 18-ի կեսօրին, երբ 20-30 հոգանոց խումբը հարձակվել է Wildberries-ի գրասենյակի վրա, որը գտնվում է Կրեմլից 900 մետր հեռավորության վրա՝ «Ռոմանով դվոր» բիզնես կենտրոնում:
Հարձակվողները կոտրել են ապակիներ, որից հետո կրակոցներ են սկսվել։ Արդյունքում զոհվել է երկու մարդ՝ անվտանգության աշխատակիցն ու բիզնես կենտրոնի աշխատակիցը, ևս 10 մարդ վիրավորվել է։ Տուժածների թվում են Չեչնիայից ժամանած երեք հայտնի MMA մարզիկներ՝ Աբուբաքար Մեստոևը, Ռաշիդ Կոձևը և Ումար Չիչաևը։
Թարգմանությունը՝ Տաթև Ֆռանգյանի
