22.11.2024 | 13:51
Արդարադատության փոխնախարարի ԺՊ Արմենուհի Հարությունյանն ազատվել է զբաղեցրած պաշտոնից
«Հատում է բոլոր սահմանները»․ Ադրբեջանի ԱԳՆ-ն՝ ԱՄՆ Կոնգրեսում Արցախի վերաբերյալ լսումների մասին
Քաղաքականություն
20.09.2024 | 12:34
Ադրբեջանի ԱԳՆ խոսնակ Այխան Հաջիզադեն արձագանքել է ԱՄՆ Կոնգրեսի Մարդու իրավունքների հանձնաժողովում Արցախի վերաբերյալ անցկացված լսումներին։ Նշենք, որ ԱՄՆ Ներկայացուցիչների պալատի Թոմ Լանոսի մարդու իրավունքների հանձնաժողովում «Մարդու իրավունքներն Ադրբեջանում Լեռնային Ղարաբաղի անկումից ի վեր» խորագրով լսումների ընթացքում քննարկվել է Արցախում տեղի ունեցած էթնիկ զտումը։ Միջոցառմանը մասնակցել է նաև Արցախի մարդու իրավունքների նախկին պաշտպան Գեղամ Ստեփանյանը։
«Ցավոք, ԱՄՆ Կոնգրեսի անդամների կողմից կազմակերպված նման միակողմանի և կողմնակալ միջոցառումները, որոնք առաջնորդվում են իրենց ներքին նկատառումներով և անձնական, այլ ոչ թե ԱՄՆ ազգային անվտանգության շահերով, վաղուց սովորական են դարձել ԱՄՆ Կոնգրեսում: Ավելին, հաշվի առնելով, որ լսումները կազմակերպած կոնգրեսականներն իրենց ներկայացնում են որպես պետությունների ինքնիշխանության և տարածքային ամբողջականության հարգման խորը ջատագովներ, նախկին անջատողական վարչակարգի ներկայացուցիչների մասնակցությունն այս լսումներին նույնպես դուրս է գալիս բոլոր մտացածին սահմաններից»,- հայտարարել է Հաջիզադեն։
Ըստ նրա՝ այս ամենի նպատակն ադրբեջանա-ամերիկյան հարաբերությունների սրումն է։
«Անցյալ տարի Ադրբեջանի կողմից ձեռնարկված հակաահաբեկչական միջոցառումները լիովին համապատասխանում էին միջազգային իրավունքին, ներառյալ՝ միջազգային մարդասիրական իրավունքին, և Ադրբեջանը երբեք չի թիրախավորել խաղաղ բնակիչներին»,- հերթական կեղծիքն է պնդել Ադրբեջանի ԱԳՆ պաշտոնյան։
Նա նշել է, թե, իբր, «հայկական սփյուռքի կողմից ֆինանսավորվող որոշ անհատների և կազմակերպությունների կողմից Ադրբեջանում մարդու իրավունքների վիճակի վերաբերյալ լսումների ժամանակ հնչած պնդումները որևէ հիմք չունեն, և խստորեն դատապարտում են նման հայտարարությունները»։ Ադրբեջանցի պաշտոնյան նաև դժգոհություն է հայտնել լսումների ժամանակ Արցախ տեղանվան կիրառման կապակցությամբ։
«Ադրբեջանական կողմը կոչ է անում ԱՄՆ Կոնգրեսի ղեկավարությանը խուսափել ադրբեջանա-ամերիկյան երկկողմ հարաբերություններին վնասող նման միջոցառումներից և ակնկալում է, որ Պետքարտուղարությունը, որպես արտաքին քաղաքականության իրականացումը մշտադիտարկող մարմին, համապատասխան միջոցներ կձեռնարկի ԱՄՆ Կոնգրեսում հայկական լոբբիստական խմբերի կողմից կազմակերպվող նման միջոցառումների դեմ»,- ասվում է Ադրբեջանի ԱԳՆ հայտարարության մեջ։
Թարգմանությունը՝ Էմմա Չոբանյանի
