ԵԽ պատգամավորները կոչ են անում դադարեցնել ԵՄ-ի և Բաքվի միջև գազային գործարքը, Ադրբեջանից պահանջում դադարեցնել քաղբանտարկյալների դեմ հարուցած գործերը

Եվրախորհրդարանի մի խումբ սոցիալիստ և դեմոկրատ պատգամավորներ կոչ են արել դադարեցնել Ադրբեջանում տնտեսագետ Գուբադ Իբադօղլուի և այլ քաղբանտարկյալների դեմ հարուցված քրեական գործերը։ Հայտարարությունն ընդունվել է քաղաքական գործչի դստեր՝ Ժալյա Բայրամովայի հետ նախօրեին տեղի ունեցած հանդիպումից հետո։

«Մենք խորը մտահոգություն հայտնեցինք թափանցիկության և կոռուպցիայի դեմ պայքարող Իբադօղլուի իրավիճակի կապակցությամբ, որին  կեղծ մեղադրանք է առաջադրվել՝ Ադրբեջանի իշխանությունների դեմ նրա քննադատական ​​ձայնը լռեցնելու համար», – ասվում է հայտարարության մեջ:

Եվրախորհրդարանի պատգամավորները պահանջել են «անհապաղ և անվերապահ հանել Գուբադ Իբադօղլուին ուղղված բոլոր մեղադրանքները և ազատ արձակել նրան, որպեսզի նա ստանա այն բժշկական օգնությունը, որի կարիքն ունի։ Նրա առողջական վիճակը պահանջում է շտապ բժշկական օգնություն, և Ադրբեջանի իշխանությունները պետք է թույլ տան Իբադօղլուին լքել երկիրը՝ արտերկրում բուժման նպատակով»,- նշել են հայտարարության հեղինակները։

COP 29-ի նախաշեմին փաստաթղթի հեղինակները կոչ են արել ԵՄ-ի անդամ պետությունների ու կառավարությունների ղեկավարներին առաջին տեղում դնել մարդու իրավունքների խնդիրները։

«Մենք ևս մեկ անգամ կոչ ենք անում անհապաղ դադարեցնել ԵՄ-ի և Բաքվի միջև կնքված գազային գործարքը, որն ուղղակիորեն հակասում է մեր կլիմայական հավակնություններին և հիմնարար սկզբունքներին»,- ասվում է հայտարարության մեջ։

Այն նաև կոչ է պարունակում Եվրախորհրդարանին՝ հոկտեմբերի 1-ին կայանալիք լիագումար նիստում ընդունել բանաձև՝ խստորեն դատապարտելով այլախոհների բռնաճնշումներն Ադրբեջանում։

«Մենք պահանջում ենք արդարություն Գուբադ Իբադօղլուի և բոլոր նրանց համար Ադրբեջանում, որոնք իրենց ազատությամբ վճարում են ժողովրդավարության համար պայքարում»,- ասվում է հայտարարությունում։

Թարգմանությունը՝ Էմմա Չոբանյանի