Եվրախորհրդարանը ԵՄ երկրներին կոչ է արել չեղարկել Ուկրաինայի կողմից ՌԴ տարածքին հարվածելու համար զենքի կիրառման սահմանափակումները

Եվրախորհրդարանը ԵՄ անդամ երկրներին կոչ է արել չեղարկել Ուկրաինայի կողմից Ռուսաստանի տարածքում օրինական ռազմական օբյեկտներին հարվածելու համար զենքի կիրառման սահմանափակումները։ Այս մասին ասված է սեպտեմբերի 19-ին ընդունված բանաձևում։ Դրան կողմ է քվեարկել 425, դեմ՝ 131, ձեռնպահ՝ 63 պատգամավոր, գրում է Current Time-ը։

Պատգամավորները նշել են, որ զենքի կիրառման սահմանափակումները թույլ չեն տալիս Ուկրաինային լիովին իրացնել ինքնապաշտպանության իրավունքը և երկիրը խոցելի են դարձնում խաղաղ բնակչության ու ենթակառուցվածքների վրա հարձակումների համար։

Նրանք զինամթերքի մատակարարումն անբավարար են համարում, իսկ դրանց կիրառման սահմանափակումները, իրենց կարծիքով, նվազեցնում են նախկին ջանքերի արդյունավետությունը։ Պատգամավորները նաև ափսոսանք են հայտնել Ուկրաինային ռազմական օգնության կրճատման կապակցությամբ։

«Այս կապակցությամբ [Եվրախորհրդարանը] վերահաստատում է իր կոչերը անդամ պետություններին՝ կատարել 2023 թվականի մարտին ստսանձնած պարտավորությունը՝ մեկ միլիոն արկ մատակարարել Ուկրաինային, արագացնել զենքի, մասնավորապես, հակաօդային պաշտպանության ժամանակակից համակարգերի և այլ զենք ու զինամթերքի մատակարարումը՝ ի պատասխան հստակ սահմանված կարիքների, այդ թվում՝ Taurus հրթիռների»,- ասվում է հայտարարության մեջ։

Թարգմանությունը՝ Տաթև Ֆռանգյանի