Իսրայելը Լիբանանի հետ սահմանին զորքեր է տեղակայում՝ այստեղ պայթյունների շարքի ֆոնին

Իսրայելի պաշտպանության բանակը (IDF), Լիբանանում էլեկտրոնային սարքերի պայթյունների ֆոնին, սկսել է 98-րդ դիվիզիան Գազայի հատվածից տեղափոխել հյուսիսային սահման, գրում է Ynet-ը։

Այսպիսով, 162-րդ և 252-րդ դիվիզիաները մնացել են Գազայի հատվածում։ Ավելի վաղ Իսրայելի պաշտպանության նախարար Յոավ Գալանտը հայտարարել էր պատերազմի նոր փուլի մեկնարկի մասին։

«Ծանրության կենտրոնը շարժվում է դեպի հյուսիս։ Մենք ուժերը, ռեսուրսներն ու էներգիան վերաուղղում ենք դեպի հյուսիս։ Կարծում եմ, որ այս պատերազմի նոր փուլի շեմին ենք և պետք է հարմարվենք: Մեզ ժամանակի ընթացքում անհրաժեշտ կլինի հետևողականություն, այս պատերազմը պահանջում է հսկայական քաջություն, վճռականություն և հաստատակամություն»,- նախարարի խոսքերն է մեջբերում The Times of Israel-ը։

Այս որոշումը կայացվել է Լիբանանում տեղի ունեցած մի շարք պայթյունների ֆոնին։ Սեպտեմբերի 17-ին և 18-ին «Հըզբոլլահ» խմբավորման փեյջերների, կապի միջոցների և այլ սարքավորումների լայնածավալ պայթյուններ են տեղի ունեցել։ Ավելի քան 20 մարդ զոհվել է, մի քանի հազարը՝ վիրավորվել։

«Հըզբոլլահ»-ի ներկայացուցիչները պայթյունների համար մեղադրել են իսրայելական հետախուզությանը, որը վիրուսներ է օգտագործել կամ պայթուցիկներ տեղադրել այդ սարքավորումներում: Խմբավորման ներկայացուցչի խոսքով՝ գաջեթների պայթեցումն «անվտանգության ամենամեծ խախտումն էր», որը «Հըզբոլլահ»-ը կրել է Իսրայելի հետ հակամարտության շուրջ մեկ տարվա ընթացքում:

Թարգմանությունը՝ Տաթև Ֆռանգյանի