«Նոա»-ն երկարաձգել է պայմանագիրը Հայաստանի ֆուտբոլի ազգային թիմի անդամ Գոռ Մանվելյանի հետ:
«Արմենպրես»-ի հաղորդմամբ` «Նոա»-ն երկարաձգել է ֆուտբոլիստի հետ պայմանագիրը երեք տարով։
Գոռ Մանվելյանը ծնվել է Լեռնային Ղարաբաղում։ 5 տարեկանում ընտանիքի հետ տեղափոխվել է Ֆրանսիայի Սեն-Լո քաղաք, որտեղ սկսել է ֆուտբոլային առաջին քայլերը։ 13 տարեկանում տեղափոխվելով «Նանտ»-ի ակադեմիա՝ հայ ֆուտբոլիստը խաղացել է ակումբի տարբեր տարիքային թիմերում, այդ թվում նաև գլխավոր թիմում։ Ակումբի հրավերով նախորդ տարի սեպտեմբերին Մանվելյանն ընտանիքի հետ տեղափոխվել է Երևան ու համալրել «Նոա»-ի կազմը։
Հայաստանի երիտասարդական հավաքականում Գոռ Մանվելյանն անցկացրել է 4 հանդիպում, այնուհետև հրավիրվել է ազգային հավաքական, որի կազմում օրեր առաջ նշել է նորամուտը՝ խաղադաշտ դուրս գալով Ազգերի լիգայի 2-րդ տուրի՝ Հյուսիսային Մակեդոնիայի հետ խաղի վերջնամասում։ «Նոա»-ի կազմում Մանվելյանն անցկացրել է 23 խաղ Հայաստանի առաջնությունում ու դարձել 3 գոլի ու 1 գոլային փոխանցման հեղինակ, իսկ Կոնֆերենցիաների լիգայում մասնակցել է 7 խաղի ու դարձել 1 գոլի ու 3 գոլային փոխանցման հեղինակ։
