Ուկրաինայի ԶՈՒ-ն Տվերի մարզում հարվածել է զինամթերքի պահեստին․ քաղաքի մասնակի տարհանում է հայտարարվել․ ՏԵՍԱՆՅՈՒԹ

Սեպտեմբերի 18-ի գիշերը ուկրաինական անօդաչու սարքերը հարձակվել են Տվերի մարզի Տորոպեց քաղաքի զորամասի վրա։ ՀՕՊ համակարգերը խոցել են անօդաչու թռչող սարքերը, սակայն բեկորների անկման հետևանքով ռազմական օբյեկտի տարածքում ուժեղ հրդեհ է բռնկվել՝ ուղեկցվելով զինամթերքի պայթյուններով, հայտնում է Astra տելեգրամ ալիքը։

«Բնակիչների անվտանգությունն ապահովելու համար Տվերի մարզի նահանգապետ Իգոր Ռուդենյան որոշել է մասամբ տարհանել բնակչությանը այն տարածքից, որտեղ հակաօդային պաշտպանություն է գործում և հրդեհը մեկուսացվում է»,- հայտնել են շրջանային կառավարությունից։

Դրանից հետո Տորոպեցի բնակիչներին սկսել են տանել հարևան Արևմտյան Դվինա քաղաք։ Տեղի իշխանությունները նաև հայտարարել են, որ սեպտեմբերի 18-ին Տվերի մարզի Զապադնոդվինսկ շրջանում մանկապարտեզները և դպրոցները չեն գործի։

Տորոպեցը Տվերի մարզի ամենարևմտյան քաղաքն է և Տվերից ամենահեռավոր շրջանային կենտրոնը։ 2021 թվականի դրությամբ դրանում բնակվում է 11,4 հազար մարդ։

Տորոպեցում գործում է 54169 զորամասը, որը, ինչպես հիշեցնում է ASTRA-ն, արդեն երկու անգամ հարձակման էր ենթարկվել ուկրաինական անօդաչու թռչող սարքերի կողմից։

Մասնավորապես, հունիսի 29-ի առավոտյան երկու անօդաչու թռչող սարքեր թռել են դեպի Տորոպեց և պայթել զորամասի տարածքի վրա՝ հրդեհի պատճառ դառնալով։ Մինչ այս՝ մայիսի 5-ին, ռազմական օբյեկտի վրա մեկ անօդաչու թռչող սարք էր խոցվել։ Սակայն տեղի իշխանությունները այս մասին չէին հայտնել։

Վերջին անգամ անօդաչու թռչող սարքերը հարձակվել էին Տվերի շրջանի վրա սեպտեմբերի 1-ին, այն ժամանակ Կոնակովո թաղամասում հինգ անօդաչու թռչող սարք են խոցել, որոնցից մեկն ընկել է գազաբաշխիչ կայանի մոտ, իսկ մյուսը՝ Կոնակովոյի պետական թաղամասի էլեկտրակայանի տարածքում։ Անօդաչու թռչող սարքի բեկորների վայր ընկնելու հետևանքով կայարաններում հրդեհ է բռնկվել։ Ոչ ոք չի տուժել։

Ռուսաստանի պաշտպանության նախարարության առավոտյան զեկույցում ասվում է, որ Տվերի մարզում անօդաչու թռչող սարքեր են խոցվել։ Ռազմական գերատեսչությունը հայտնել է ուկրաինական 54 անօդաչու թռչող սարքեր որսալու և ոչնչացնելու մասին։ Դրանցից 24-ը խոցվել է Կուրսկի շրջանի, 16-ը՝ Բրյանսկի, 7-ը՝ Սմոլենսկի, 3-ը՝ Բելգորոդի և 1-ը՝ Օրյոլի շրջաններում:

Թարգմանությունը՝ Տաթև Ֆռանգյանի