Քաղաքականություն
17.09.2024 | 17:51
Եվրահանձնաժողովի նախագահ Ուրսուլա ֆոն դեր Լեյենը հրապարակել է այն 27 անձանց անունները, որոնց նա մտադիր է ընդգրկել իր թիմում առաջիկա հինգ տարիների ընթացքում։ ԵՄ արտաքին գործերի և անվտանգության քաղաքականության բարձր ներկայացուցիչը պետք է լինի Էստոնիայի նախկին վարչապետ Կայա Կալլասը, որն այս պաշտոնում փոխարինելու է Ժոզեպ Բորելին, գրում է DW-ի ռուսական ծառայությունը։
Նախատեսվում է Ֆրանսիայի Եվրոպայի և արտաքին գործերի նախարար Ստեֆան Սեժուրնեին նշանակել Եվրոպական արդյունաբերական ռազմավարության և ներքին շուկայի եվրոպական հանձնակատար։ Նա այս պաշտոնին անցնում է այն բանից հետո, երբ նախօրեին Թիերի Բրետոնը հրաժարվել է միանալ Եվրահանձնաժողովի նոր կազմին։ Որպես այս որոշման պատճառ Բրետոնը նշել է է ֆոն դեր Լեյենի հետ հակամարտությունը։ Նրա խոսքով՝ ֆոն դեր Լեյենը մի քանի օր առաջ կոչ է արել Ֆրանսիայի կառավարությանը միջոցներ ձեռնարկել՝ ստիպելու իրեն հանել իր թեկնածությունը Եվրահանձնաժողովի նոր կազմի ձևավորման գործընթացում։
Առաջին անգամ պաշտպանության հարցերով հանձնակատարի պաշտոն կհայտնվի Եվրահանձնաժողովի կազմում, այն պետք է զբաղեցնի լիտվացի պատգամավոր, Եվրախորհրդարանի հատուկ զեկուցող Անդրիուս Կուբիլիուսը։
Տնտեսական հարցերի և արտադրության եվրոպական հանձնակատարի պաշտոնի համար ֆոն դեր Լեյենն առաջարկել է լատվիացի Վալդիս Դոմբրովսկիսին, տնտեսական անվտանգության հարցերով հանձնակատարի պաշտոնի համար՝ սլովակ Մարոս Շեֆովիչին, իսկ մրցակցության գծով հանձնակատարի՝ իսպանացի Թերեզա Ռիբերային։ Ինքը՝ ֆոն դեր Լեյենը, երկրորդ ժամկետով կմնա Եվրահանձնաժողովի ղեկավար։
Պաշտոնյան նշել է, որ նոր կազմում պետք է լինի 11 կին, ինչը համապատասխանում է 40 տոկոս քվոտային։
Եվրահանձնաժողովի նոր կազմն աշխատանքը կսկսի նոյեմբերի 1-ից, եթե Եվրախորհրդարանը հաստատի բոլոր թեկնածուներին։
