Քաղաքականություն
17.09.2024 | 17:29
Ուկրաինական լայնամասշտաբ պատերազմի 2,5 տարվա ընթացքում Ուկրաինայի մարտական կորուստները գնահատվում են 80 հազար զոհված և 400 հազար վիրավոր զինվորական, Ռուսաստանինը՝ 200 հազար զոհ և 400 հազար վիրավոր, հայտնում է Wall Street Journal-ը, որին վկայակոչում է BBC-ի ռուսական ծառայությունը։
Ուկրաինական կորուստների մասով լրատվամիջոցը հղում է անում երկրի կառավարության գաղտնի գնահատականը։ Ռուսական կորուստների թիվն էլ ելնում է արևմտյան հետախուզության անանուն աղբյուրներից, ընդ որում, WSJ-ն ընդունում է, որ կան տարբեր գնահատականներ:
Երկու կողմերի պաշտոնյաները միայն մի քանի անգամ են նշել իրենց մարտական կորուստների թվերը (Ուկրաինայի նախագահը դա նշել է փետրվարին, Ռուսաստանի պաշտպանության նախարարությունը վերջին անգամ՝ 2022 թվականի սեպտեմբերին): Սակայն դիտորդների մեծամասնության կողմից այդ թվերն անիրական էին համարվում:
Պատերազմի սկզբից BBC-ն և Mediazona-ն զոհված ռուս զինվորականների հաշվարկ են անում, որոնց անունները հասանելի են բաց աղբյուրներում։ Վերջին նման ցուցանիշը հրապարակել է Mediazona-ն անցյալ ուրբաթ, այն է՝ 69,059 մարդ։ Այս ցուցանիշն ակնհայտորեն հաշվի չի առնում բոլոր զոհված զինվորականներին և պետք է դիտարկվի որպես նվազագույն ցուցանիշ:
WSJ-ը նշում է, որ Ուկրաինայի համար կորուստներն ավելի զգայուն են, քան Ռուսաստան համար․ նրա բնակչությունը երեք անգամ ավելի պակաս էր նույնիսկ մինչ ռուսական ներխուժումը: Մեծ պատերազմը հանգեցրել է նրան, որ խաղաղ բնակչության մի մասը հայտնվել է օկուպացված տարածքներում, մյուս մասը՝ մեկնել այլ երկրներ, կա նաև մահացության զգալի թիվ, որը հեռու է ամբողջական հաշվարկից։
WSJ-ը մեջբերում է նաև Ուկրաինայի կառավարության կողմից նախկինում չբացահայտված գնահատականները, որոնք ենթադրում են, որ 25-ից մինչև 27 միլիոն մարդ այժմ մնում է Կիևի կողմից վերահսկվող տարածքում: Լրատվամիջոցը ներկայացնում է Ուկրաինայի ԳԱԱ ժողովրդագրության և սոցիալական հետազոտությունների ինստիտուտի հետազոտող Ալեքսանդր Գլադունինի գնահատականը։ Նա կարծում է, որ երկրի իշխանությունների կողմից վերահսկվող տարածքում այժմ ապրում է 29 միլիոն մարդ, իսկ մինչ ներխուժումն այս թիվը 42 միլիոն էր։
Ուկրաինայում խաղաղ բնակչության շրջանում զոհերի թվի ամբողջական գնահատականները որևէ տեղ չեն հրապարակվել։ Human Rights Watch-ը, մի քանի այլ ոչ կառավարական կազմակերպությունների հետ միասին, փետրվարին հրապարակել էր Մարիուպոլի պաշարման ուսումնասիրության արդյունքները պատերազմի սկզբում: Այն ժամանակ խաղաղ բնակչության զոհերի նվազագույն թիվը գնահատվել էր 8 հազար։
