Թրամփի դեմ մահափորձի մեջ կասկածվողը խոսել է Պուտինին և Կիմ Չեն Ինին սպանելու ցանկության մասին

ԱՄՆ նախագահի թեկնածու Դոնալդ Թրամփի դեմ մահափորձի մեջ կասկածվող Ռայան Ուեսլի Ռութը մտադիր է եղել սպանել նաև ՌԴ նախագահ Վլադիմիր Պուտինին և Հյուսիսային Կորեայի առաջնորդ Կիմ Չեն Ընին։ Այս մասին The Wall Street Journal-ին (WSJ) հայտնել է ամերիկուհի Չելսի Ուոլշը, որը 2022 թվականին աշխատել է Ուկրաինայում որպես բուժքույր և այնտեղ մի քանի անգամ հանդիպել է Ռութին։

Իր աշխատանքի ընթացքում կինը կազմել է այն մարդկանց ցուցակը, որոնց պահվածքն իրեն «գիշատիչ» և «հակասոցիալական» է թվացել։ Այդ ցուցակում Ռայան Ուեսլի Ռութն առաջինն է եղել։ Կիևում առաջին հանդիպման ժամանակ Ռութը Ուոլշին էքսցենտրիկ է թվացել, բայց ոչ վտանգավոր։ Հաջորդ «տասնյակ հանդիպումների» ընթացքում, սակայն, նրա կարծիքը փոխվել է:

Կնոջ խոսքով՝ նա խոսել է Վլադիմիր Պուտինին ու Կիմ Չեն Ընին սպանելու ցանկության մասին, հիշատակել է նաև Թրամփին ու ԱՄՆ նախագահ Ջո Բայդենին։ Բուժքույրը չի կարողացել հիշել՝ արդյո՞ք ամերիկացին սպառնացել է վերջին երկու քաղաքական գործիչներին։

Ֆրանսիայի անանուն քաղաքացին, որը մեկնել էր Ուկրաինա՝ պատերազմին մասնակցելու համար, WSJ-ին ասել է, որ Ռայան Ուեսլի Ռութն օգնել է իրեն տեղ ապահովել ուկրաինական բանակի ստորաբաժանումում: Ֆրանսիացին պնդել է, որ ամերիկացին բարկացած էր Թրամփի վրա, քանի որ նա «փորձում էր բանակցություններ վարել Պուտինի հետ՝ Ուկրաինային իսկապես աջակցելու փոխարեն»:

Reuters-ը գրում է, որ Ռայան Ուեսլի Ռութը գրեթե 12 ժամ անցկացրել է գոլֆի դաշտում՝ սպասելով Դոնալդ Թրամփին։ Միաժամանակ, հրապարակայնորեն չի հայտարարվել, որ քաղաքական գործիչը կգա այնտեղ, և հայտնի չէ՝ արդյո՞ք կասկածյալը գիտեր Թրամփի ծրագրերի մասին։