07.10.2026 | 17:28
«Գուստավը» հայտարարում է՝ մենեջերն ազատվել է աշխատանքից․ թաքնված տեսախցիկի դեպքով նյութերն ուղարկվել են ՔԿ
ՌԴ-ն զանգվածային հարձակման է ենթարկել Սումիի շրջանի էներգետիկ օբյեկտները
Քաղաքականություն
17.09.2024 | 14:06
Ուկրաինայի Սումիի շրջանի էներգետիկ համակարգի օբյեկտները երեքշաբթի գիշերը «Շահեդ» տեսակի անօդաչու թռչող սարքերի զանգվածային հարձակման են ենթարկվել, հայտնում է շրջանային ռազմական վարչությունը, փոխանցում է BBC-ի ռուսական ծառայությունը։
«Կարևոր ենթակառուցվածքային օբյեկտները՝ ջրամատակարարման ծառայությունները, հիվանդանոցները և այլք, միացված են պահեստային էներգահամակարգերին»,- ասվում է առավոտյան տարածված հայտարարության մեջ:
Գիշերը Սումիի քաղաքային խորհուրդը հայտնել է, որ գիշերվա սկզբին անօդաչու թռչող սարքի հարվածից հետո քաղաքային ջրամատակարարման բոլոր օբյեկտները հոսանքազրկվել են, ջրամատակարարման համակարգը միացվել է վթարային պահուստային էներգետիկ համակարգին, ջուրը մատակարարվել է նվազեցված ճնշմամբ:
Մարզային ռազմական վարչությունը պարզաբանում է, որ տուժել են նաև Կոնոտոպ, Ախտիրսկի և Սումի շրջանների բնակավայրերը։ Ըստ այդ տվյալների՝ Սումիի շրջանում հակաօդային պաշտպանության համակարգերի կողմից խոցվել է 16 կամիկաձե անօդաչու թռչող սարք։
Սումիի քաղաքապետի պաշտոնակատար Արտյոմ Կոբզարը հայտնել է, որ զոհեր չկան, հարձակման հետևանքների վերացմամբ զբաղվում են մասնագետները։
Ռուս զինվորականները չեն մեկնաբանել Սումիի շրջանի վրա նոր զանգվածային հարձակումը, որը սահմանակից է Ուկրաինայի զորքերի կողմից մասնակիորեն օկուպացված Կուրսկի շրջանին։
