19.07.2026 | 11:32
Ահազանգ է ստացվել, որ Կապան քաղաքի Բաղաբերդ թաղամասում այրվում է տնակ․ ՆԳՆ
Ռազմական «ֆեյքերի» գործով 6 տարվա ազատազրկման դատապարտված լրագրող Մարիա Պոնոմարենկոն հացադուլ է հայտարարել
Քաղաքականություն
16.09.2024 | 17:07
Ռուսական բանակի մասին ռազմական «ֆեյքերի» գործով 6 տարվա ազատազրկման դատապարտված RusNews-ի լրագրող Մարիա Պոնոմարենկոն հացադուլ է հայտարարել։ Այս մասին նա ասել է Ալթայի երկրամասի Շիպունովսկի շրջանային դատարանի նիստում, որտեղ քննարկվում է գաղութի աշխատակցին ոչ վտանգավոր վնաս պատճառելու քրեական գործը (Ռուսաստանի Դաշնության Քրեական օրենսգրքի 321-րդ հոդվածի 2-րդ մաս):
Նիստից առաջ Պոնոմարենկոն դատարանի ուշադրությունը հրավիրել է յոթ նկատողության վրա, որոնց պատճառով նրան ուղարկել են պատժախուց, գրում է RusNews-ը։ Նա պնդում է, որ չի իմացել դրանց մասին, իսկ իր ստորագրությունների կեսը «կեղծված» է:
Պոնոմարենկոն հավելել է, որ մարմնական վնասվածքների վերաբերյալ արձանագրության մեջ ևս կեղծվել է իր ստորագրությունը։ Նա խոստացել է հացադուլ անել այնքան ժամանակ, քանի դեռ դատախազը չի ներկայացել դատական նիստին։ Այժմ նիստին մասնակցում է ոչ թե գլխավոր, այլ փոխարինող դատախազը, պարզաբանում է պարբերականը։
Լրագրողը կալանավորվել է 2022 թվականի ապրիլին Սանկտ Պետերբուրգում։ 2023 թվականի փետրվարին Բառնաուլի դատարանը նրան դատապարտել է 6 տարվա ազատազրկման ռուսական բանակի մասին «կեղծիքներ» տարածելու մեղադրանքով՝ Մարիուպոլի դրամատիկական թատրոնի վրա հարձակման մասին Telegram-ում գրառման համար, որի արդյունքում կարող էր շուրջ 600 մարդ սպանված լինել։
