Պուտինը մեկնել էր Մոնղոլիա՝ «շամանների օրհնությունը խնդրելու»․ Der Spiegel

Սեպտեմբերի սկզբին ՌԴ նախագահ Վլադիմիր Պուտինի այցը Մոնղոլիա, չնայած Միջազգային քրեական դատարանի օրդերով ձերբակալման վտանգին, ուղեկցվել է մոնղոլ շամանների հետ ՌԴ նախագահի հանդիպումներով։ Այս մասին Der Spiegel-ի սյունակում գրել է «Դոժդի» նախկին գլխավոր խմբագիր, լրագրող Միխայիլ Զիգարը՝ հղում անելով Կրեմլում իր աղբյուրներին։

Զիգարի զրուցակիցների խոսքով՝ շամանների հետ հանդիումը կարող էր լինել Պուտինի անսպասելի ուղևորության գլխավոր նպատակը, որը հայտարարվել էր վերջին 5 տարում առաջին անգամ Մոնղոլիա նրա այցից ընդամենը 3 օր առաջ։

Մոնղոլ շամանները, պնդում է Զիգարը, համարվում են աշխարհի ամենահզորներից, ինչպես և Տուվայի շամանները, ուր Պուտինը բազմիցս ճանապարհորդել է պաշտպանության նախկին նախարար Սերգեյ Շոյգուի ուղեկցությամբ՝ լուսանկարվելով տայգայի ֆոնին սոճու կոները ձեռքին և մերկ կրծքավանդակով՝ ձիու վրա:

Հենց Շոյգուն է, ըստ Զիգարի, օգնել Պուտինին կապ հաստատել շամանների հետ։ Ռուսաստանի նախագահը նաև կապվել է ուղղափառ «երեցների» հետ և խորհրդակցել բազմաթիվ միստիկների հետ մինչև Ուկրաինա ներխուժելը, և բոլորը նրան հավաստիացրել են մոտալուտ ռազմական հաղթանակի մասին, ասել են լրագրողի աղբյուրները։

Մոսկվայում լուրեր են պտտվում, որ շամաններին հերթական այցի ժամանակ Պուտինը կարող էր օրհնություն խնդրել միջուկային զենքը՝ «աստվածների զենքն» օգտագործելու համար, գրում է Զիգարը։ Նա ենթադրում է, որ այս վարկածը, կարծես, «մեծ ֆանտազիա» է, և աղբյուրներից ոչ մեկն ուղղակիորեն չի հաստատում այն, թեև մոնղոլ շամանների հետ հանդիպում, մեծ հավանականությամբ, եղել է։