Ադրբեջանի ընդդիմադիր կուսակցության ղեկավարը Մեջլիսի ընտրություններից հետո հրաժարական է տվել

Ադրբեջանի ընդդիմադիր «Հանրապետական ​​այլընտրանք» կուսակցության (REAL) քաղաքական հանձնաժողովը նախնական քննարկումներ է անցկացրել սեպտեմբերի 1-ին անցկացված արտահերթ խորհրդարանական ընտրությունների արդյունքների վերաբերյալ։ Որոշվել է խորհրդարանական ընտրությունները գնահատել դրանց պաշտոնական արդյունքներն ու դրանցում կուսակցական թեկնածուների մասնակցությունն ամփոփելուց հետո։

Ադրբեջանական լրատվամիջոցների հաղորդմամբ՝ քաղաքական կոմիտեն ընդունել է Իլգար Մամեդովի հրաժարականը կուսակցության նախագահի պաշտոնից։ Որոշվել է մինչև սեպտեմբերի 30-ն ավարտել նախագահության փոխանցման գործընթացը, որպեսզի քաղկոմիտեի նոր ղեկավարը հոկտեմբերի 1-ից սկսի իր պարտականությունների կատարումը։ Մամեդովը, սակայն, մնում է քաղաքական կոմիտեի անդամ։

Հավելենք, որ երբ Կենտրոնական ընտրական հանձնաժողովը չէր բավարարել Մամեդովի բողոքը իր շրջանում խորհրդարանական ընտրությունների արդյունքները չեղարկելու վերաբերյալ՝ չնայած կեղծիքների ապացույցներին, նա հայտարարել էր կուսակցության ղեկավարի պաշտոնից հեռանալու մասին։

«Արդյունքում, ինչպես և խոստացել էի 2023 թվականին, ես հեռանում եմ REAL կուսակցության ղեկավարի պաշտոնից։ Ընտրությունների արդյունքների վերաբերյալ Սահմանադրական դատարանի որոշումից հետո քաղաքական հանձնաժողովը կընտրի կուսակցության նոր ղեկավարին»,- ասել էր Մամեդովը։

Նա REAL-ի նախագահն է 2010 թվականից։ Շարժումը հիմնադրվել է 2008 թվականին, իսկ որպես կուսակցություն գրանցվել 2020 թվականի օգոստոսին։

2013 թվականի հունվարին Իլգար Մամեդովը մեղավոր էր ճանաչվել Քրեական օրենսգրքի 220.1 և 315.2 հոդվածներով և դատապարտվել 7 տարվա ազատազրկման։ 2014-ին Եվրոպական դատարանը որոշում էր կայացրել, որ նա կալանավորվել է քաղաքական դրդապատճառներով։

Մամեդովը պայմանական վաղաժամկետ ազատ է արձակվել 2018 թվականին։ Վերջին  տարիներին նա ակտիվ շփումներ է պահպանում Ադրբեջանի իշխանությունների հետ, անգամ տարբեր հարցերում աջակցում։

Էմմա Չոբանյան