Քաղաքականություն
16.09.2024 | 12:16
«Բորիս» փոթորկի հետևանքով առաջացած հորդառատ անձրևները հեղեղումների են հանգեցրել Կենտրոնական և Արևելյան Եվրոպայում: Ջուրը լցվել է հազարավոր տներ, էլեկտրաէներգիայի մատակարարումների խափանումներ են գրանցվել։ Զոհեր կան։
Լեհաստանում երկրի հարավում տեղի ունեցած ջրհեղեղների պատճառով տարերային աղետի ռեժիմ է հայտարարվել, հայտնել է երկրի վարչապետ Դոնալդ Տուսկը։
«Իրավասու նախարարների և ծառայությունների հետ խորհրդակցություններից հետո ես հրահանգեցի պատրաստել Նախարարների խորհրդի հրամանագիրը տարերային աղետի ռեժիմ մտցնելու մասին»,- գրել է Տուսկը X սոցցանցում։
Ավելի վաղ Լեհաստանի վարչապետը ֆինանսների նախարարին հանձնարարել էր միջոցներ հատկացնել քաղաքացիներին շտապ օգնություն ցուցաբերելու և ջրհեղեղի հետևանքները վերացնելու համար, ինչպես նաև խնդրել էր պաշտպանության նախարարին լրացուցիչ ուժեր ուղարկել տուժած շրջաններ։
«Մենք ոչ մեկին չենք թողնի բախտի քմահաճույքին»,- ընդգծել է նա։
Լեհաստանի հարավ-արևմուտքում հորդառատ անձրևներից և դրան հաջորդած Նիսա գետի վարարումից հետո տներ են հեղեղվել, որոշ շրջաններում ջուրը քշել է կամուրջները: Մի շարք բնակավայրերում տարհանումներ են սկսվել ուղղաթիռների միջոցով։ Վատ եղանակի պատճառով չորս վոյեվոդությունների ավելի քան 350 մանկապարտեզներում և դպրոցներում դասերը դադարեցվել են։ Երկու մարդ է զոհվել։ Ջրհեղեղը որակել են ամենասարսափելին 1997 թվականից ի վեր։
Հորդառատ անձրևները ջրհեղեղների են հանգեցրել նաև Ավստրիայում, Չեխիայում, Ռումինիայում և Մոլդովայում։ Եվրոպական երկրներում աղետի տարերային աղետի պատճառով առնվազն ութ մարդ է զոհվել, հայտնում է BBC-ն։
Ավստրիայում մեկ հրշեջ է զոհվել քաղաքացիներին ջրհեղեղից փրկելու գործողության ժամանակ, գրում է Reuters-ը։
Ամենաշատ զոհերը գրանցվել են Ռումինիայում․ այստեղ մահացել է վեց մարդ։ Ռումինիայի արևելքում գտնվող Գալաթի գավառում 12 բնակավայր և մի քանի հազար տնային տնտեսություն է լրջորեն տուժել, ավելի քան 250 մարդ տարհանվել է։ Որոշ բնակավայրերում ջրածածկ փողոցներում ջրի մակարդակը հասել է մեկուկես մետրի։
Չեխիայում 56 հազար բնակչություն ունեցող Օպավա քաղաքում մինչև 10 հազար բնակիչ ստիպված է եղել լքել տները, հազարավոր մարդիկ տարհանվել են Կրնով քաղաքից, որը գրեթե ամբողջությամբ հեղեղվել է։ Ոստիկանությունը հայտնել է, որ առնվազն չորս մարդ անհետ կորել է։ Միաժամանակ, հաղորդվում է, որ չեխ փրկարարները որոնում են երեք մարդու, որոնք եղել են երկրի արևելքում գետն ընկած ավտոմեքենայում։
Ստորին Ավստրիայի իշխանությունները շրջանի ամբողջ տարածքը հայտարարել են «աղետի գոտի», մոտ 1,1 հազար տուն է տարհանվել։
Մոլդովայում հորդառատ անձրևների պատճառով Քիշնևը և տասնյակ այլ բնակավայրեր հեղեղվել են, բնակիչները մնացել են առանց էլեկտրականության։
🚨🇦🇹🇵🇱 | FLOODING HITS CENTRAL EUROPE
— sustainme.in®️ (@sustainme_in) September 16, 2024
Severe flooding affects parts of Central Europe, including Poland and the Czech Republic. Footage from Głuchołazy, Poland, shows extreme flooding.#Wien #Wienfluss #penzing #Hochwasserschutz #Powodź pic.twitter.com/LTG9XvlM4r
