20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
Վրաստանում «Ո՛չ Կրեմլի բռնապետությանը» կարգախոսով բողոքի ցույցեր են անցկացվել
Քաղաքականություն
16.09.2024 | 11:33
Վրաստանի քաղաքներում բողոքի ցույցեր են անցկացվել «Ո՛չ Կրեմլի բռնապետությանը» կարգախոսով՝ իշխող «Վրացական երազանք» կուսակցության հիմնադիր Բիձինա Իվանիշվիլիի հայտարարություններից հետո, որը վրացական կողմին մեղադրել է 2008 թվականի ռուս-վրացական պատերազմը սկսելու մեջ և խոստացել ներողություն խնդրել դրա համար «oս եղբայրներից ու քույրերից»:
Թբիլիսիում ակցիա է անցկացվել խորհրդարանի շենքի դիմաց։ Ակցիայի մասնակիցներից՝ «Դապիոնի» երիտասարդական շարժման առաջնորդ Զվիադ Ցկետլաձեն ասել է, որ վրաց ժողովրդին ստիպում են ներողություն խնդրել «պատերազմի համար, որը մենք չենք սկսել»։
«Մեր կոլլաբորացիոնիստ-օլիգարխը թքեց Վրաստանի ինքնիշխանության և տարածքային ամբողջականության համար պայքարած մեր զոհված հերոսների հոգիների մեջ, միևնույն ժամանակ, վիրավորեց վետերաններին, հերոսներին, ովքեր վտանգել են իրենց առողջությունը, կյանքը և ամեն ինչը հանուն հայրենիքի։ Մեզ համար անհնար էր տանը մնալ և սրան չարձագանքել։ Չափազանց կարևոր է, որ բոլորը դուրս գան փողոց։ Սա որևէ կոնկրետ խմբի բողոք չի լինելու, սա արժանավոր հասարակության, արժանավոր ազգի բողոք է»,- նրա խոսքերն է մեջբերում «Էխո Կավկազա»-ն։
«Ես չգիտեմ մեկ իրական քաղաքացու, որը լսել է [Իվանիշվիլիի հայտարարությունը] և ցանկացել է ծափահարել նրան։ Ես եկել եմ որպես զայրացած քաղաքացի, եկել եմ համերաշխության համար։ Վրաստանում պետք է լինի իշխանություն, որը կծառայի ժողովրդի շահերին, այլ ոչ թե Ռուսաստանի»,- իր հերթին հայտարարել է «Ուժեղ Վրաստան» կոալիցիայի առաջնորդներից Լևան Ցուցկիրիձեն։
Սեպտեմբերի 14-ին Գորի քաղաքում նախընտրական հանրահավաքի ժամանակ Իվանիշվիլին հայտարարել է, որ Վրաստանն ուժ կգտնի ներողություն խնդրելու 2008 թվականին Հարավային Օսիայի հետ պատերազմի համար։ Նրա խոսքով՝ դա տեղի կունենա հոկտեմբերին կայանալիք խորհրդարանական ընտրություններում իշխող «Վրացական երազանք» կուսակցության հաղթանակից հետո։
2008 թվականի 5-օրյա պատերազմի հետևանքով Ռուսաստանը պաշտոնապես ճանաչեց Աբխազիայի և Հարավային Օսիայի անկախությունը, որոնց տարածքի մեծ մասը 1990-ականների սկզբից վրացական իշխանությունների վերահսկողության տակ չէին, այնտեղ տեղակայված էին ռուս զինվորականներ։
Վրաստանը պաշտոնապես այդ շրջանները համարում է Ռուսաստանի կողմից օկուպացված։
