Ու՞մ հետ է վերջին անգամ տեսակցել Նաիրի Հունանյանը․ մանրամասներ նրա պահման վայրի և առողջական վիճակի մասին

Հատկապես Մարտի 1-ի բացահայտման ուղղությամբ ընթացող զարգացումների ֆոնին ակտիվացան խոսակցությունները նաև 99թ․ հոկտեմբերի 27 -ի ոճրագործության կազմակերպիչների բացահայտման անհրաժեշտության շուրջ։

Թեև ֆորմալ առումով գործը համարվում է բացահայտված, սակայն կատարվածից 19 տարի անց էլ չեն դադարում խոսակցությունները, որ այդ ոճրագործությունն ունեցել է կազմակերպիչներ, որոնք այսօր ազատության մեջ են: Եվ ահա այս ֆոնին օրերս տեղեկություններ տարածվեցին այն մասին, որ ահաբեկչական խմբի պարագլուխ Նաիրի Հունանյանն իր առանձնախցում չէ, ավելին, նա ՔԿՀ-ում չէ, նաև լուրեր տարածվեցին, թե քաղաքական իրավիճակի փոփոխությամբ պայմանավորված՝ կարող են խնդիրներ առաջանալ նրա անվտանգության հետ կապված։

Factor.am-ը Նաիրի Հունանյանի պահման վայրի, առողջական վիճակի և անվտանգության հետ կապված հարցերի շուրջ պաշտոնական նամակով դիմեց Հայաստանի արդարադատության նախարարին։ Մասնավորապես ՝ մենք հետաքրքրվել էինք, թե որտեղ է գտնվում Հունանյանը, ինչի վերաբերյալ ԱՆ քրեակատարողական ծառայության պետի տեղակալի անունից Factor.am -ին ուղարկված պաշտոնական գրությունում ասված է, որ Նաիրի Հունանյանը պատիժը կրում է ՀՀ ԱՆ «Երևան Կենտրոն» քրեակատարողական հիմնարկում՝ իրեն հատկացված խցում՝ ընդհանուր հիմունքներով։

Մենք նաև հարցրել էինք, թե առողջական ինչ վիճակում է գտնվում Հունանյանը և արդյոք ունի խնդիրներ։ Այս հարցի հետ կապված՝ քրեակատարողական ծառայության պետի տեղակալը վստահեցրել է, որ Հունանյանը ներկայումս առողջական խնդիրներ չունի, ազատազրկման ընթացքում ըստ անհրաժեշտության նրան ցուցաբերվել է անհրաժեշտ բուժօգնություն։ Ինչ վերաբերում է Նաիրի Հունանյանի տեսակցություններին և մեր հարցին, թե վերջին անգամ երբ և ում հետ է նա տեսակցություն ունեցել, մեզ տրված պաշտոնական պատասխանում նշված է, որ Նաիրի Հունանյանի կապն ընտանիքի և արտաքին աշխարհի հետ ապահովվում է օրենքով սահմանված կարգով։ Վերջին անգամ Նաիրի Հունանյանը տեսակցել է եղբոր հետ՝ 2017 թվականի նոյեմբերի 17-ին, ասել է թե՝ ավելի քան տասն ամիս առաջ։

Այսպիսով՝ Արդարադատության նախարարության քրեակատարողական ծառայությունը վստահեցնում է, որ Նաիրի Հունանյանը ողջ առողջ է, որևէ խնդիր չունի և շարունակում է իր պատիժը կրել նույն պայմաններում։