Ես ուտելու համար չեմ ապրում հայրենիքում, այստեղից էլ ուտելու համար չեն գնում. Դանիելյանը`վարչապետին․ՏԵՍԱՆՅՈՒԹ

«Դերասանը չի կարող մի տեղ նստել, նա ուղղակի կփտի: Արտիստը պետք է ամբողջ աշխարհում լինի: Վարչապետին կխնդրեի այս ոլորտ չմտնել, չխանգարի` լավ ա»,- Factor TV-ի հետ զրույցում նշում է դերասան Սերգեյ Դանիելյան`անդրադառնալով օրերս վարչապետ Նիկոլ Փաշինյանի`բուռն քննարկումների կիզակետում հայտնված գրառմանը, որտեղ նշվում է. «Հայաստանի Հանրապետության կոչը սեփական քաղաքացիներին`այստեղ հաց, այստեղ կաց…»: Վարչապետի մեկնաբանմամբ` կարգախոսը վերաբերում է նաև արվեստագետներին, այդ թվում` դերասանին, որը նաև ոչ նյութական արժեքներ ստեղծելով է «հացում, այսինքն հաց ստեղծում»:
Դերասանը շեշտում է`«այստեղ կենալու համար» հարկավոր է անվտանգության և արդարության հաստատում. «Վարչապետն ասում է`ամեն մեկն ունի իր արդարությունը, այդպես չէ´: Արդարությունը բարոյականություն չէ: Համակարգ է պետք ստեղծել: Իշխանությունն ու հասարակությունը պետք է իրար սեղմեն: Էն «բազարը», որ եղավ 2018-ին, արդարությունը վերականգնելու խնդիր ուներ, դա որ լինի` մնացածը տեղը կընկնի: Չի´ կարող լինել սիրված օլիգարխ, որը հետո դառնում է գործարար, չի´ կարող լինել պաշտոնյա, որը մեկի բաջանաղն է: Այստեղ հաց` այստեղ կաց, դե դու էլ` կաց: Ես ուտելու համար չեմ ապրում հայրենիքում, ես ուտելու համար չեմ ծնվել: Ի դեպ, Հայաստանից էլ վաղուց ուտելու համար չեն գնում»:
Նրա համոզմամբ` ադեկվատ իշխանությունը կարող է ծնել ադեկվատ հասարակություն, և այդ երկուսը պետք է միասին աճեն. «Չի կարող տենդի մեջ գտնվող հասարակությունը լինել անվտանգ, ամեն վայրկյան ենք վտանգի սպասում»:
Սերգեյ Դանիելյանի հետ զրուցեցինք նաև թատրոնից: Նրա խոսքով` թե´ նախկին, թե´ ներկա պաշտոնյաներից, ընդ որում` բարձրաստիճան, երբեմն գնում են թատրոն, նաև` իր ներկայացումներին. «Սկզբում ձգված են լինում, հետո բացվում են, կան նաև, որ հումորով են: Ես առանձնապես չեմ սիրում, որ գալիս են իմ ներկայացումներին: Դահլիճը լարված է լինում, ես, իհարկե, ցրում եմ այդ մթնոլորտը»:

Մանրամասները`տեսանյութում:
Աննա Բաբաջանյան