07.10.2026 | 23:48
Արթուր Դանիելյանը կալանավորվեց
ՌԴ-ն երկրից վտարում է Մեծ Բրիտանիայի 6 դիվանագետի․նրանք մեղադրվում են Ռուսաստանի անվտանգությանը սպառնալու մեջ
Քաղաքականություն
13.09.2024 | 17:12
ՌԴ Անվտանգության դաշնային ծառայությունը հայտարարել է Մոսկվայում Մեծ Բրիտանիայի դեսպանատան վեց աշխատակիցների հավատարմագրման դադարեցման մասին, որոնց գործողություններում, ինչպես նշվում է, «բացահայտվել են հետախուզական և դիվերսիոն աշխատանքի նշաններ», գրում է Current time-ը։
ԱԴԾ-ն նշում է, որ «փաստաթղթային նյութեր են ստացվել, որոնք հաստատում են Լոնդոնի կողմից միջազգային ռազմաքաղաքական իրավիճակի սրման համակարգումը»։ Դրանք, իբր, վկայում են այն մասին, որ Մեծ Բրիտանիայի ԱԳՆ-ի Արևելյան Եվրոպայի և Կենտրոնական Ասիայի տնօրինությունը «ռուսական ուղղությամբ դիվերսիոն քաղաքականության իրականացումը համակարգող հիմնական ստորաբաժանումն է», ինչպես նաև այն «վերափոխվել» է հետախուզական ծառայության. որի հիմնական խնդիրն է ռազմավարական վնաս հասցնել ՌԴ-ին»։
«Բացահայտված փաստերը հիմք են տալիս տնօրինության միջոցով Մոսկվա ուղարկված բրիտանացի դիվանագետների գործունեությունը որպես Ռուսաստանի Դաշնության անվտանգությանը սպառնալիք համարել»,-ասվում է հայտարարության մեջ։ Հավատարմագրերից զրկումը նշանակում է երկրից դիվանագետների ավտոմատ վտարում։
«Ռոսիա 24» պետական հեռուստաալիքը հայտնել է վտարված բրիտանացի դիվանագետների անունները՝ Ջեսիկա Դևենպորտ, Գրեյս Էլվին, Էնդրյու Դաֆթ Քալում, Քեթրին Մակդոնալ, Թոմաս Ջոն Հիքսոն և Բլեյք Փաթել։ Նրանք, ինչպես հեռուստաալիքի եթերում ասել է ԱԴԾ աշխատակիցը, հանդիպել են ԶԼՄ-ների և հասարակական կազմակերպությունների ներկայացուցիչների հետ, որոնք ճանաչվել են որպես «օտարերկրյա գործակալներ»: Նրանց թվում են՝ «Մեմորիալն» ու «Новая газета»-ն։
ՌԴ ԱԳՆ պաշտոնական ներկայացուցիչ Մարիա Զախարովան էլ մեղադրել է Մոսկվայում Մեծ Բրիտանիայի դեսպանատանը «դիվերսիոն գործողությունների» մեջ, որոնք «ուղղված են ռուս ժողովրդին վնաս պատճառելուն»։
