30.04.2026 | 23:18
ՀՀ 4 քաղաքում մթնոլորտային օդում փոշու պարունակությունը գերազանցել է սահմանային թույլատրելի կոնցենտրացիան
Քննարկվել են անվտանգության մարտահրավերները, որոնց բախվում են փոքր և միջին պետությունները
Քաղաքականություն
12.09.2024 | 20:59
ՀՀ ԱԳՆ գլխավոր քարտուղար Դավիթ Կարապետյանի գլխավորությամբ սեպտեմբերի 9-11-ը կայացած «Երևանյան երկխոսություն» միջազգային համաժողովի շրջանակներում տեղի է ունեցել «Ժամանակակից դարաշրջանում փոքր և միջին պետությունների համար անվտանգության նոր մարտահրավերներ» խորագրով փակ քննարկումը:
ՀՀ ԱԳՆ-ից տեղեկացնում են, որ որպես հատուկ հյուր ելույթով հանդես է եկել ՀՀ արտաքին հետախուզական ծառայության պետ Քրիստիննե Գրիգորյանը: Բանախոսներն էին Ջորջ Մարշալլ ռազմավարական հետազոտությունների կենտրոնի տնօրեն Բարր Ռ. Սեգինը (ԱՄՆ ռազմաօդային ուժերի պաշտոնաթող գեներալ-մայոր), Մերձավոր Արևելքի և Հարավային Ասիայի ռազմավարական հետազոտությունների կենտրոնի պրոֆեսոր Դեյվիդ Դե Ռոշը (ԱՄՆ), Լոնդոնի Մերձավոր Արևելքի և Աֆրիկայի ինստիտուտի (SOAS) տնօրեն և SOAS համալսարանի քաղաքականության և միջազգային հետազոտությունների ամբիոնի պրոֆեսոր Լինա Խատիբը, Հայաստանի կիրառական քաղաքականության հետազոտական ինստիտուտի ավագ գիտաշխատող Լեոնիդ Ներսիսյանը:
Քննարկվել են անվտանգության բազմատեսակ մարտահրավերները, որոնց բախվում են փոքր և միջին պետությունները ավելի ու ավելի բարդացող գլոբալ լանդշաֆտում, մասնավորապես՝ համաշխարհային խոշոր տերությունների մրցակցության, կլիմայի փոփոխության և օրեցօր զարգացող տեխնոլոգիաների ազդեցության պայմաններում: Մասնակիցները կարծիքներ են փոխանակել դիմակայունության բարձրացման, ամուր գործընկերային հարաբերությունների կառուցման, ներքին կայունության ու արտաքին ճնշումների միջև հավասարակշռության ձեռքբերման վերաբերյալ:
Անդրադարձ է կատարվել նաև տարածաշրջանային համագործակցության դերի գնահատմանը փոքր ու միջին պետությունների անվտանգության ամրապնդման գործում, անվտանգության ներքին և արտաքին սպառնալիքների կառավարման բարդություններին, ասիմետրիկ սպառնալիքների հակազդմանը՝ ոչ պետական դերակատարների, ահաբեկչության և կիբեռհարձակումների հետևանքով առաջացած մարտահրավերներին:
