Իսրայելի ուժերը հարձակվել են Սիրիայում Իսլամական հեղափոխության պահապանների կորպուսի բազայի վրա․ փաստաթղթեր են առգրավվել

Այս շաբաթվա սկզբին իսրայելական հատուկ ուժերը հարձակում են իրականացրել Սիրիայի Մասյաֆի շրջանում գտնվող իրանական զենքի օբյեկտի վրա, գրում է The Times of Israel-ը։

Մի շարք ենթադրյալ իսրայելական հարվածներ, որոնց մասին ավելի վաղ հաղորդվել էր, կիրակի երեկոյան ուղղված են եղել Սիրիայի կենտրոնական հատվածում գտնվող ռազմական օբյեկտներին, ինչի հետևանքով զոհվել է առնվազն 14 մարդ, վիրավորվել՝ 43-ը, հրդեհներ են բռնկվել: Սիրիական լրատվամիջոցները հաղորդել են, որ հարվածների թիրախ է դարձել Մասյաֆի հետազոտական ​​կենտրոնը, որը երկար ժամանակ կապվում է Սիրիայի և իրանական ուժերի կողմից քիմիական զենքի ու ճշգրիտ հրթիռների արտադրության հետ:

Սակայն նոր զեկույցներն առաջին անգամ պնդում են, որ իսրայելական զորքերը գործելեն Մասյաֆում, որը գտնվում է Իսրայելից մոտ 200 կիլոմետր հյուսիս։

Թուրքիայում գործող ընդդիմադիր Syria TV-ն նշում է, որ իսրայելական ուղղաթիռները վայրէջք չեն կատարել սիրիական հողի վրա, փոխարենը սավառնել են երկնքում, իսկ հատուկ ջոկատայինները ցած են իջել ճոպաններով։ Նշվում է, որ բախումներ են եղել, որոնց ընթացքում երեք սիրիացի սպանվել է, իսկ երկուսից չորս իրանցիներ գերի են ընկել:

Գործողության շրջանակում թիրախավորված օբյեկտների թվում է եղել ռուսական կապի կենտրոնը։ Աղբյուրները պարբերականին հայտնել են, որ սիրիական հակաօդային պաշտպանությունը թուլացել է Իսրայելի վերջին հարձակումների պատճառով, ինչը թույլ չի տվել նրանց խափանել կիրակնօրյա հարձակումը, և որ Սիրիան ստեղծել է միջադեպի հետաքննության բարձր մակարդակի հանձնաժողով:

Մերձավոր Արևելքի հարցերով հետազոտող Եվա Ջ.Կուլուրիոտիսի խոոքով՝ «անվտանգության աղբյուրն» իրեն հայտնել է, որ Իսրայելի պաշտպանության բանակի գործողությունը թիրախավորել է Իսլամական հեղափոխության պահապանների կորպուսի (ԻՀՊԿ) օբյեկտը, որը մշակում է բալիստիկ հրթիռներ և անօդաչու թռչող սարքեր, նաև նյութատեխնիկական աջակցություն ցուցաբերում լիբանանյան «Հըզբոլլահ»-ին: Նա նշել է, որ իսրայելական զորքերը մտել են համալիր, հանել սարքավորումներն ու փաստաթղթերը, այնուհետև պայթուցիկներ տեղադրել՝ օբյեկտը ոչնչացնելու համար:

ԱՄՆ կառավարությանը պատկանող Al Hurra ցանցը հաղորդում է, որ հարձակումը թիրախավորել է Մասյաֆի շրջանում գտնվող մի քանի վայրեր, և որ դրանց ինտենսիվությունն ու զոհերի թիվը «անսովոր» են եղել։

Իսրայելի կողմից գործողության վերաբերյալ որևէ մեկնաբանություն չի եղել։