Եվրաջասթի նախագահը կայցելի Հայաստան 

Եվրոպական միության քրեական արդարադատության ոլորտում համագործակցության գործակալության՝ Եվրաջասթի նախագահ Լադիսլավ Համրանը սեպտեմբերի 23-ին կայցելի Երևան, այս մասին Կառավարության նիստին տեղեկացրեց Արդարադատության նախարար Գրիգոր Մինասյանը։

Նա մանրամասնեց, որ այցի շրջանակներում կստորագրվի  Եվրաջասթի և Հայաստանի Հանրապետության իրավասու մարմինների միջև քրեական գործերով դատական համագործակցության մասին համաձայնագրին կից աշխատակարգ-համաձայնագիրը։

Արդարադատության նախարի խոսքով՝ աշխատակարգ-միջազգային պայմանագիրը կստորագրեն ՀՀ գլխավոր դատախազը և Եվրաջասթի նախագահը։

Կառավարության  նիստում էլ քննարկվեց համաձայնագրին կից աշխատակարգը։

«Համաձայնագրին կից աշխատակարգը հնարավորություն է տալու համագործակցության հարցերով դատախազի ներկայացվածությանը, նրա գործունեության շրջանակին, մասնավորապես՝ Եվրաջասթի կոլեգիայի լիագումար նիստերի, աշխատանքային խմբի աշխատանքներին, ռազմավարական նշանակության հանդիպումներին, իրազեկման միջոցառումներին և ծրագրերին մասնակցության հետ կապված հարցերի կարգավորում ապահովել»,- ընդգծեց Գրիգոր Մինասյանը։

Նշենք, որ ԱԺ-ն օրերս ընդունել է Եվրաջասթի և ՀՀ իրավասու մարմինների միջև դատական համագործակցության մասին համաձայնագիրը, որի նպատակն է զարգացնել կազմակերպված հանցավորության, ահաբեկչության, փողերի լվացման, թրաֆիքինգի և այլ ծանր հանցագործությունների դեմ պայքարում Եվրաջասթի և ՀՀ իրավասու մարմինների միջև միջազգային համագործակցությունը:

Կառավարության այսօրվա նիստի ընթացքում վարչապետ Նիկոլ Փաշինյանը Գլխավոր դատախազ Աննա Վարդապետյանից հետաքրքրվեց՝ թե ինչ հարց ենք լուծում այս համակարգին միանալով։

Աննա Վարդապետյանը պատասխանեց, որ խոսքն իրավական օգնության շրջանակում քրեական վարույթի ընթացքում երրորդ երկրներ ուղարկվող իրավական օգնության հարցումների և տարբեր տվյալների հայցման մասին է, որոնք պաշտպանված են անհատական տվյալների պաշտպանության գործիքակազմով, այդ պատճառով դրանք չեն հրապարակվում, բայց օգտագործվում են քրեական վարույթների շրջանակում: Գլխավոր դատախազը նաև նշեց, որ  հայ դատախազը, որը ներկայացված կլինի այնտեղ,  կոնտակտային անձն է,  և նրա միջոցով ապահովելու են հարցումների օպերատիվ հասանելիությունը ԵՄ անդամ երկրներին։

Տեղեկացնենք, որ Հայաստանը ԵՄ անդամ երկիր չհանդիսացող երրորդ երկրների շարքում է (13-րդն է), որը ստորագրել է համաձայնագիրը։