26.12.2025 | 23:15
Ալիևն Արցախում իր ընտանիքին պատկանող հերթական հյուրանոցն է բացել
Լյուքսեմբուրգի ԱԳ նախարարի՝ Երևան այցից հետո Բայրամովը հեռախոսազրույց է ունեցել նրա հետ և բողոքել Հայաստանից
Քաղաքականություն
12.09.2024 | 15:09
Ադրբեջանի ԱԳ նախարար Ջեյհուն Բայրամովը հեռախոսազրույց է ունեցել Լյուքսեմբուրգի Մեծ Դքսության փոխվարչապետ, ԱԳ և արտաքին առևտրի նախարար Քսավյե Բետելի հետ։ Ադրբեջանական կողմի հաղորդմամբ՝ հեռախոսազրույցի ընթացքում քննարկվել են երկու երկրների համագործակցության, ինչպես նաև տարածաշրջանային և միջազգային անվտանգության հարցեր։ Կողմերը նշել են նման շփումների կարևոր դերը Ադրբեջանի և Լյուքսեմբուրգի միջև հարաբերությունների զարգացման, փոխադարձ հետաքրքրություն ներկայացնող հարցերի քննարկման գործում։
Բայրամովը զրույցի ընթացքում շարունակել է ադրբեջանական կեղծ քարոզչական թեզերը ներկայացնել Հայաստանի վերաբերյալ։
Նշվում է, որ Բայրամովը Լյուքսեմբուրգի արտգործնախարարին մանրամասն տեղեկացրել է հետհակամարտային շրջանում տարածաշրջանում առկա իրավիճակի և իրողությունների, ինչպես նաև Ադրբեջանի և Հայաստանի միջև հարաբերությունների կարգավորման գործընթացում առաջընթացի մասին։
«Նախարարն ընդգծել է, որ Հայաստանի օրենսդրության մեջ առկա տարածքային պահանջները մեր երկրի նկատմամբ, ինչպես նաև այդ երկրի արագացված ռազմականացումը տարածաշրջանում խաղաղության հաստատման կայուն գործընթացին սպառնացող հիմնական գործոններն են»,- ասվում է ադրբեջանական կողմի հաղորդագրության մեջ։
Նշենք, որ սեպտեմբերի 9-10-ը պաշտոնական այցով Հայաստանում էր Լյուքսեմբուրգի Մեծ Դքսության փոխվարչապետ, ԱԳ և արտաքին առևտրի նախարար Քսավյե Բետելը։ Նա հանդիպել է ՀՀ վարչապետ Նիկոլ Փաշինյանին, ԱԳ նախարար Արարատ Միրզոյանին, մասնակցել Yerevan Dialogue միջազգային համաժողովին։
