30.05.2026 | 23:02
ՊՍԺ-ն երկրորդ տարին անընդմեջ դարձավ Չեմպիոնների լիգայի հաղթող․ ՏԵՍԱՆՅՈՒԹ
Թուրքիան դատապարտել է ԱՄՆ-ի և Կիպրոսի միջև ռազմական համագործակցության պայմանագրի կնքումը
Քաղաքականություն
12.09.2024 | 14:44
Թուրքիան դատապարտել է ԱՄՆ-ի և Կիպրոսի միջև ռազմական համագործակցության համաձայնագրի կնքումը՝ Վաշինգտոնին մեղադրելով հակամարտությունում իր չեզոք դիրքորոշումից հրաժարվելու մեջ։
«Մենք դատապարտում ենք ԱՄՆ-ի և Կիպրոսի հունական վարչակազմի միջև պաշտպանական երկկողմ համագործակցության ընդլայնման ճանապարհային քարտեզի ստորագրումը։ Մենք համաձայն ենք այս հարցի վերաբերյալ Հյուսիսային Կիպրոսի Թուրքական Հանրապետության արտաքին գործերի նախարարության տարածած հայտարարության մեջ արտահայտված տեսակետներին և լիովին աջակցում ենք ՀԿԹՀ իշխանությունների արդարացված արձագանքին»,-ասվում է Թուրքիայի ԱԳՆ-ի տարածած հայտարարության մեջ։
Նշվում է, որ «ի վնաս Կիպրոսի թուրքական կողմի անվտանգության՝ ԱՄՆ իշխանությունների ձեռնարկած այս քայլերը, ներառյալ՝ անցյալ տարվա հունիսին կիպրահույների վարչակազմի հետ ռազմավարական երկխոսության մեկնարկի հայտարարությունը, խաթարում են Կիպրոս կղզու նկատմամբ ԱՄՆ-ի չեզոք դիրքորոշումը և դժվարացնում են Կիպրոսի հարցի արդար, տևական և կայուն լուծմանը հասնելը»։
«Այս համատեքստում մենք կարծում ենք, որ այն քաղաքականությունները, որոնք կարող են խաթարել տարածաշրջանային կայունությունը, պետք է վերանայվեն։ Թուրքիան, որպես երաշխավոր պետություն, կշարունակի ապահովել Կիպրոսի թուրքերի անվտանգությունն ու բարգավաճումը բոլոր հանգամանքներում»,- ասվում է հայտարարությունում։
Հավելենք, որ սեպտեմբերի 9-ին ԱՄՆ պաշտպանության նախարարի միջազգային անվտանգության հարցերով օգնական Սելեստ Վոլանդերը և Կիպրոսի Հանրապետության պաշտպանության նախարար Վասիլիս Պալմասը Նիկոսիայում ստորագրել են երկու երկրների միջև երկկողմ պաշտպանական համագործակցության ճանապարհային քարտեզ:
