22.02.2026 | 00:10
Արթուր Ավետիսյանը՝ աշխարհի գավաթի հաղթող, Մամիկոն Խաչատրյանը՝ արծաթե մեդալակիր
Թուրքիան համաշխարհային ինդեքսում բնական աղետների բարձր ռիսկային երկրների շարքում է
Քաղաքականություն
12.09.2024 | 11:08
Թուրքիան 193 երկրների շարքում բնական աղետների նկատմամբ իր խոցելիության պատճառով ընդգրկված է բարձր ռիսկային երկրների շարքում․ 2024 թվականի համաշխարհային ռիսկերի զեկույցի համաձայն՝ համաշխարհային վարկանիշով Թուրքիան 35-րդն է, գրում է Turkish Minute-ը։
Զեկույցը հրապարակվել է Խաղաղության և զինված հակամարտությունների միջազգային իրավունքի ինստիտուտի և ինը գերմանական զարգացման կազմակերպությունների դաշինքի՝ Bündnis Entwicklung Hilft-ի կողմից։
Զեկույցը բացահայտում է, թե որ երկրներն են առավել վտանգված բնական աղետների առումով, և ինչ կարելի է անել՝ աղետները կանխելու և դրանց հետևանքները մեղմելու համար։ Այն ընդգրկում է ՄԱԿ-ի անդամ 193 պետություններ՝ հիմնված 100 առաջնային ցուցանիշների և նոր մեթոդաբանական ընթացակարգերի վրա, որոնք կապված են բնական աղետներին երկրի ազդեցության և արձագանքելու հասարակության կարողությունների հետ:
0-ից (շատ ցածր ռիսկ) մինչև 100 (շատ բարձր ռիսկ) սանդղակով Թուրքիայի ազդեցության գնահատականը եղել է 8,90, խոցելիության միավորը եղել է 23,55, դիմակայելու կարողության պակասի միավորը՝ 50,01, իսկ հարմարվողական կարողությունների բացակայությունը՝ 16,32:
Թուրքիան հաճախ ենթարկվում է բնական աղետների, որոնք հանգեցնում են բազմաթիվ մարդկանց մահվան, ինչը հարցեր է առաջացնում աղետից հետո կառավարության արձագանքման արդյունավետության և նման միջադեպերի հետևանքները մեղմելու նրա կարողության վերաբերյալ:
Վերջին խոշոր երկրաշարժերը հարվածել են երկրի հարավային և հարավ-արևելյան 11 նահանգներին 2023 թվականի փետրվարին՝ պատճառելով հսկայական վնաս և խլելով ավելի քան 53,000 մարդու կյանք: Մարդիկ քննադատում էին կառավարությանը, որ վերջին երկու տասնամյակների ընթացքում այն չի ձեռնարկել անհրաժեշտ միջոցներ, որպեսզի երկրաշարժերի հանդեպ դիմակայուն շենքեր կառուցվել՝ հաշվի առնելով այն փաստը, որ երկիրը գտնվում է խոշոր խզվածքների վրա:
Թուրքիան նաև հաճախակի է ենթարկվում անտառային հրդեհների և ջրհեղեղների, որոնք ամեն տարի հանգեցնում են տասնյակ մարդկանց մահվան՝ ի հավելումն անտառների և քաղաքների զանգվածային ավերածությունների։
Անտառային հրդեհների մասին տեղեկատվական համակարգի (EFFIS) տվյալների համաձայն՝ այս տարի Թուրքիայում առնվազն 74 անտառային հրդեհ է գրանցվել, որոնք ոչնչացրել են 12,910 հեկտար (31,900 ակր) տարածք:
