22.02.2026 | 00:10
Արթուր Ավետիսյանը՝ աշխարհի գավաթի հաղթող, Մամիկոն Խաչատրյանը՝ արծաթե մեդալակիր
Թրամփի հետ բանավեճից հետո Թեյլոր Սվիֆթը հայտարարել է Քամալա Հարիսին աջակցելու մասին
Քաղաքականություն
11.09.2024 | 14:54
Ամերիկացի փոփ աստղ Թեյլոր Սվիֆթը, որն Instagram-ում շուրջ 300 միլիոն հետևորդ ունի, հայտնել է, որ ԱՄՆ-ի առաջիկա ընտրություններում աջակցելու է դեմոկրատ թեկնածու Քամալա Հարիսին, գրում է Current time-ը։
«Ես իմ ձայնը տալու եմ Քամալա Հարիսին ու Թիմ Ուոլցին 2024 թվականի նախագահական ընտրություններում»,- գրել է Սվիֆը։
Նա նշել է, որ Հարիսին համարում է «լավ խորաթափանցությամբ օժտված առաջնորդ»։ Սվիֆթը համոզմունք է հայտնել, որ Միացյալ Նահանգները կարող է ավելիին հասնել, եթե առաջնորդվի «հանգստությամբ, ոչ թե քաոսով»։
Երգչուհին նաև պատմել է, որ հրապարակային հայտարարություն անելու որոշման վրա ազդել է Դոնալդ Թրամփի՝ արհեստական բանականության միջոցով ստեղծված իր լուսանկարների հրապարակումը, որոնցում Սվիֆթը, իբր, պաշտպանում է նրա թեկնածությունը։
«Դա ինձ հանգեցրեց եզրակացության, որ ես պետք է լինեմ շատ անկեղծ այս ընտրություններում իմ իրական պլանների մասին»,- գրել է նա։
Ընթացիկ նախագահական քարոզարշավում երգչուհին արդեն կոչ է արել ամերիկացիներին քվեարկել սուպեր երեքշաբթի օրը։ Ենթադրվում է, որ Սպիտակ տունն ակտիվորեն փորձում էր ստանալ Սվիֆթի աջակցությունը՝ հույս ունենալով, որ նա կօգնի դեմոկրատներին հաղթել նախագահական ընտրություններում։ Ամերիկյան լրատվամիջոցները գրել էին, որ Թեյլոր Սվիֆթը Բայդենի քարոզարշավի «աջակցության ամենամեծ և ամենաազդեցիկ թիրախն էր»։ Նա 2020 թվականին աջակցել է քաղաքական գործչին, միևնույն ժամանակ, քննադատել է Դոնալդ Թրամփին։
Ամերիկացիների գրեթե մեկ հինգերորդը կամ 18 տոկոսը պատրաստ է լսել Թեյլոր Սվիֆթի առաջարկներն այս տարվա նախագահական ընտրություններում։ Այս մասին են վկայում Newsweek ամսագրի կողմից անցկացված հունվարյան հարցումները, որոնց մասնակցել է 1500 ամերիկացի։ Միաժամանակ, հարցվածների 17 տոկոսն ասել է, որ ավելի քիչ հավանական է, որ քվեարկի երգչուհու կողմից աջակցվող թեկնածուի օգտին, իսկ 55 տոկոսը նշել է, որ Սվիֆթի կարծիքը չի ազդի իրենց ընտրության վրա։
