09.09.2026 | 09:44
Հանրապետությունում ավտոճանապարհներն անցանելի են
Մեծ Բրիտանիայի ԱԳ նախարարն ու ԱՄՆ պետքարտուղարը սեպտեմբերի 11-ին Կիև կայցելեն
Քաղաքականություն
10.09.2024 | 17:26
Մեծ Բրիտանիայի ԱԳ նախարար Դեյվիդ Լեմմին հայտարարել է, որ այս շաբաթ կայցելի Ուկրաինա, ընդ որում, ինչն աննախադեպ է, նա Կիև կմեկնի ԱՄՆ պետքարտուղար Էնթոնի Բլինքենի հետ։ Վերջինն այժմ այցով Լոնդոնում է, և պաշտոնյաներն այդ մասին հայտարարել են համատեղ, հաղորդում է BBC-ի ռուսական ծառայությունը։
Լայնածավալ պատերազմի սկզբից ի վեր արևմտյան քաղաքական գործիչները հաճախ են այցելում Ուկրաինա, սակայն շատ դեպքերում նրանց այցերի մասին նախապես չի հայտարարվում՝ անվտանգության նկատառումներից ելնելով։
Լեմմին դեռևս չի մեկնել Ուկրաինա՝ հուլիսի 5-ից Մեծ Բրիտանիայի ԱԳ նախարարի պաշտոնը ստանձնելուց հետո։
ԱՄՆ Պետքարտուղարությունը ևս հաստատել է Կիև սպասվելիք այցի տեղեկությունը։ Պետքարտուղարության մամուլի խոսնակ Մեթյու Միլլերը հայտնել է, որ այցը տեղի կունենա սեպտեմբերի 11-ին։
«Պետքարտուղար Բլինքենը սեպտեմբերի 11-ին Ուկրաինա կմեկնի ՄԹ արտաքին գործերի նախարար Դեյվիդ Լեմմիի հետ՝ ցույց տալու շարունակական աջակցությունն Ուկրաինայի պաշտպանությանը Ռուսաստանի ագրեսիայից, ինչպես նաև սեպտեմբերի 12-ին կայցելի Լեհաստան՝ խորացնելու մեր համագործակցությունն ու աջակցությունը Ուկրաինային՝ որպես ՆԱՏՕ-ի դաշնակիցներ»,- X-ում գրել է Միլլերը։
