Լուկաշենկոն երկքաղաքացիություն ունեցող բելառուսներին արգելել է ծառայել ՆԳՆ-ում

Բելառուսի ղեկավար Ալեքսանդր Լուկաշենկոն հրամանագիր է ստորագրել, որը փոփոխություններ է մտցնում երկրի ներքին գործերի մարմիններում ծառայության հետ կապված, հաղորդում է նրա մամուլի ծառայությունը։ Մասնավորապես, փաստաթղթի համաձայն, օտարերկրյա պետության քաղաքացիություն (հպատակություն) ձեռք բերելը կարող է հիմք հանդիսանալ ոստիկանական ծառայության ընդունումը մերժելու և այն դադարեցնելու համար, փոխանցում է Current Time-ը։

«Փոփոխություններն ուղղված են ներքին գործերի մարմինների համալրման արդյունավետության բարձրացմանը, աշխատողների իրավական և սոցիալական պաշտպանության բարելավմանը»,- նշել են Լուկաշենկոյի մամուլի ծառայությունից։

Հրամանագրով փոփոխություններ են կատարվում մի շարք օրենսդրական ակտերում։ Այժմ փաստաթուղթը թույլ է տալիս ներքին գործերի մարմիններին ստեղծել իրենց ռազմահայրենասիրական ակումբները։ Նախկինում նման թույլտվություն ունեին Պաշտպանության նախարարությունը և ՆԳՆ ներքին զորքերը, նշում է Mediazona.Belarus-ը։

Նոր որոշմամբ ոստիկանությունում ծառայության անցնելու տարիքային շեմը 25-ից դարձել է 28 տարեկան։ Դա արվել է ծառայության տարիքային շեմը 45-ից 48 փոխելու հետ կապված։

Լուկաշենկոյի հրամանը նաև նախատեսում է «հավելյալ երաշխիքներ» ոստիկանության անդամների ընտանիքների համար՝ ՆԳՆ կազմակերպություններում անվճար բժշկական սպասարկում, ինչպես նաև առողջարանային բուժում։ Եթե ​​աշխատակիցները ներգրավվեն հասարակական կարգի պահպանության կամ տեղափոխվեն հերթապահության ուժեղացված ռեժիմի, նրանց կտրամադրվի անվճար սնունդ։