Հնդկաստանը որոշել է ռուս-ուկրաինական հակամարտության կարգավորման հարցում միջնորդի դերում հանդես գալ

Հնդկաստանի վարչապետ Նարենդրա Մոդիի՝ Մոսկվա և Կիև կատարած այցից հետո Դելին որոշել է փորձել կատարել նրա խոստումը՝ «որպես բարեկամ» օգնել խաղաղություն հաստատել Ուկրաինայում: Երկրի վարչապետի ազգային անվտանգության հարցերով խորհրդական Աջիթ Դովալն այս շաբաթ կայցելի Մոսկվա՝ քննարկելու ռուս-ուկրաինական հակամարտության կարգավորման հնարավորությունը, հայտնում է հնդկական NDTV հեռուստաալիքը՝ հղում անելով կառավարության աղբյուրներին։

Մոդին օգոստոսի 23-ին հանդիպել էր Ուկրաինայի նախագահ Վլադիմիր Զելենսկիի հետ։ Սա Հնդկաստանի առաջնորդի առաջին այցն էր Ուկրաինա 1991 թվականի անկախությունից ի վեր: Դովալը նույնպես հնդկական պատվիրակության կազմում էր: Դրանից անմիջապես հետո՝ օգոստոսի 27-ին, Մոդին հեռախոսով խոսել է Վլադիմիր Պուտինի հետ, ում հանդիպել էր հուլիսի սկզբին։ Հենց այս զրույցի ժամանակ էլ որոշվել է, որ Դովալը կգա Մոսկվա՝ քննարկելու խաղաղ բանակցությունները, հայտնում են NDTV-ի աղբյուրները։ Ուղևորության մանրամասները դեռևս հայտնի չեն։

Կիևում Զելենսկին և Մոդին մանրամասն քննարկել են Ուկրաինայի նախագահի խաղաղության բանաձևը, որն առաջնահերթություն է տալիս Ուկրաինայի տարածքային ամբողջականությանը և ռուսական զորքերի դուրսբերմանը, հաղորդում է Հնդկաստանի ԱԳ նախարարությունը:

«Մենք շատ բարձր և հստակ ասում ենք, որ աջակցում ենք ինքնիշխանության և տարածքային ամբողջականության հարգմանը։ Սա մեր ամենաբարձր առաջնահերթությունն է», – ասել է Մոդին Զելենսկիի հետ հանդիպման ժամանակ։

Դելիի ավելի ակտիվ դիրքորոշումը վկայում է այն մասին, որ Ուկրաինայի նկատմամբ վերաբերմունքը փոխվում է, և Հնդկաստանի իշխանությունները փորձում են փոխել իրենց՝ որպես կողմի ընկալումը, որն «ուկրաինական հարցերին նայում է հիմնականում ռուսական պրիզմայով», գրել է Արևելյան Եվրոպայի զարգացման ինստիտուտի դիտորդ խորհրդի նախագահ և Կիև-Մոհիլա ակադեմիայի ազգային համալսարանի միջազգային հարաբերությունների մասնագետ Միրիդուլա Ղոշը Ատլանտյան խորհրդի համար իր հոդվածում։