Վճռականորեն դեմ ենք աշխարհաքաղաքական և սահմանային փոփոխությունների ցանկացած գործողության․ Իրանի ԱԳՆ

Իրանը վճռականորեն դեմ է աշխարհաքաղաքական և սահմանային փոփոխությունների ցանկացած գործողության։ Այս մասին ճեպազրույցում հայտարարել է Իրանի ԱԳՆ խոսնակ Նասեր Քանանին, գրում է Mehr գործակալությունը։

Ինչ վերաբերում է Իրանի և Ռուսաստանի միջև համապարփակ համաձայնագրին, նա նշել է, որ աստաթուղթը մշակվել է Իրան-Ռուսաստան ռազմավարական գործընկերության համաձայնագրի ներքո և դրա ստորագրումը երկու երկրների նախագահների օրակարգում է։ Փաստաթղթի ստորագրումը կարող է անհրաժեշտ իրավական հիմքեր ստեղծել երկու երկրների միջև հարաբերությունների զարգացման համար բոլոր ոլորտներում, հատկապես՝ առևտրային և տնտեսական։

Անդրադառնալով, այսպես կոչված, «Զանգեզուրի միջանցիքն», Իրանի ԱԳՆ խոսնակը նշել է. «Իրանը կարևորում է տնտեսական հարաբերությունների և հաղորդակցության ուղիների արգելափակումների վերացմանն աջակցելը և Ադրբեջանի և Հայաստանի Հանրապետությունների միջև խաղաղության հաստատումը։ Օտար դերակատարները, որոնց շահերը ապահովում են Կովկասում անկայունությունը, ձգտում են ապակայունացնել տարածաշրջանը»։

Քանանին նաև հավելել է, որ լրջորեն աջակցում են 3+3 մոդելի վրա հիմնված տարածաշրջանային համագործակցության մեխանիզմի ամրապնդմանը։

«Իրանը հարևանության քաղաքականության շրջանակում աջակցում է կայուն խաղաղությանը Հարավային Կովկասում, և այդ շրջանակներում մենք աջակցում ենք տրանսպորտային ուղիների  արգելափակումների վերացմանը։ Մեր կարծիքով՝ այս շրջանակը կարող է օգնել ամրապնդել կայուն խաղաղությունը տարածաշրջանում։ Մենք հայտարարում ենք՝ վճռական դեմ ենք աշխարհաքաղաքական և սահմանային փոփոխությունների ցանկացած գործողության»,- հայտարարել է Իրանի ԱԳՆ խոսնակը։