Ստոկհոլմի օդանավակայանը դադարեցրել է թռիչքները մի քանի ԱԹՍ-ի հայտնաբերման պատճառով

Չորս անօդաչու թռչող սարքեր անցած գիշեր խափանել են Շվեդիայի ամենամեծ օդանավակայանի՝ Արլանդայի աշխատանքը: Aftonbladet պարբերականը, վկայակոչելով ավիացիայում պաշտոնյայի, հաղորդում է, որ օդային երթևեկության կառավարման աշտարակից նկատվել են տարբեր չափերի չորս անօդաչու թռչող սարքեր:

«Դրանից հետո որոշում է կայացվել դադարեցնել թռիչքներն ու վայրէջքները»,- ասել է ոստիկանության ներկայացուցիչը, հաղորդում է Reuters-ը։

Շվեդիայի զինված ուժերի ներկայացուցիչը հայտնել է, որ իրենք տեղյակ են Ստոկհոլմի օդանավակայանում տեղի ունեցած միջադեպի մասին, սակայն ոստիկանությունը հետաքննություն է իրականացնում։ Անօդաչուների պատկանելության մասին տեղեկություններ դեռևս չկան։

Երկուշաբթի գիշերը Արլանդա թռիչքները դադարեցվել են մի քանի ժամով, իսկ հինգ ինքնաթիռներ ուղարկվել են այլ օդանավակայաններ:

Վերջին օրերին ռուսական ռազմական անօդաչու թռչող սարքեր են թռչել ՆԱՏՕ-ի ևս երկու երկրների՝ Լատվիայի և Ռումինիայի տարածք։ Սեպտեմբերի 7-ին Բելառուսից բալթյան երկիր է մտել անօդաչու թռչող սարք, որը դարձել է առաջին դեպքը, երբ ռուսական անօդաչու թռչող սարքը խախտել է Լատվիայի օդային տարածքը 2022 թվականին Ուկրաինայում պատերազմի մեկնարկից ի վեր։ Իսկ սեպտեմբերի 8-ի գիշերը նման դեպք է տեղի ունեցել Ռումինիայում, ինչը ստիպել է զինվորականներին մարտական ինքնաթիռներ օդ բարձրացնել: Առաջին անգամ չէ, որ ռուսական ռազմական անօդաչու թռչող սարքեր են ներխուժում Ռումինիա։ Նման դեպքեր են տեղի ունեցել այս տարվա հուլիսին, ինչպես նաև 2023 թվականի դեկտեմբերին և սեպտեմբերին։