Լավրովը խոսել է ԲՐԻԿՍ-ին միանալու Թուրքիայի մտադրությունների մասին

ՌԴ ԱԳ նախարար Սերգեյ Լավրովը ԲՐԻԿՍ-ին միանալու լուրջ մտադրություններ է տեսնում Թուրքիայի ղեկավարության կողմից։ «Ես ելնում եմ նրանից, որ երբ երկրի ղեկավարությունը հայտարարում է, որ կոնկրետ քայլ է անում, դա հիմնված է լուրջ մտադրությունների վրա։ Ինչ վերաբերում է ՆԱՏՕ-ին անդամակցությանը և ԵՄ թեկնածուի կարգավիճակին, ապա ԲՐԻԿՍ-ի կանոններում գրված չէ, որ այս կամ այն ​​կազմակերպությունների անդամները չեն կարող հարաբերություններ ունենալ ԲՐԻԿՍ-ի հետ»,-ասել է Լավրովը ՌԲԿ-ի հետ հարցազրույցում։

Նա նշել է, որ լիիրավ անդամների և այն երկրների համար, որոնք տարբեր ձևերով համագործակցություն են զարգացնում ԲՐԻԿՍԻ հետ, գլխավորն ընդհանուր արժեքներ կիսելն է։

«Սրանք այն արժեքները չեն, որոնք Եվրամիությունը պաշտպանում է Ուկրաինայում։ Մենք ունենք արժեքներ, որոնք կարելի է հասկանալ՝ ուսումնասիրելով Միավորված ազգերի կազմակերպության կանոնադրությունը՝ պետությունների ինքնիշխան իրավահավասարություն, չմիջամտություն նրանց ներքին գործերին, վեճերի խաղաղ կարգավորում, հարգանք բոլոր պետությունների ինքնիշխանության և տարածքային ամբողջականության նկատմամբ»,-ասել է Լավրովը՝ հայտարարելով, որ Եվրամիությունը բացահայտորեն ցույց է տալիս  հակառուսական պատժամիջոցներին միանալու անհրաժեշտությունը, եթե Անկարան ցանկանում է դառնալ միության անդամ։

«Ինչ վերաբերում է կոնկրետ Թուրքիային, ապա ՆԱՏՕ-ի անդամները լռում են։ Ինչ-որ մեկը ինչ-որ տեղ ասում էր, որ դա անհամատեղելի է Հյուսիսատլանտյան դաշինքին անդամակցելու հետ։ Սակայն Եվրահանձնաժողովի ներկայացուցիչը շատ ավելի անկեղծ խոսեց՝ ասելով, որ Թուրքիան պետք է հասկանա, որ դեպի Եվրամիություն շարժումն անհամատեղելի է ԲՐԻԿՍ-ին անդամակցելու հետ, և որ նույնիսկ ԵՄ թեկնածուները պետք է միանան ընդհանուր արտաքին և անվտանգության քաղաքականությանը։ Սա հստակ ցուցում է, որ եթե Թուրքիան երբևէ ցանկանում է դառնալ Եվրամիության անդամ, ապա պետք է միանա հակառուսական պատժամիջոցներին»,-նշել է ՌԴ ԱԳ նախարարը։

Հիշեցնենք, որ ավելի վաղ  ՌԴ նախագահի օգնական Յուրի Ուշակովը հայտարարել էր, որ ԲՐԻԿՍ-ի երկրները քննարկելու են Թուրքիայի դիմումը՝ միությանը լիարժեք մասնակցության մասին։ «Թուրքիան լիիրավ անդամակցության հայտ է ներկայացրել։ Դիտարկելու ենք»,- նշել էր նա։

Ուշակովը  նաև հայտնել էր, որ Թուրքիայի նախագահ Ռեջեփ Թայիփ Էրդողանն ընդունել է Կազանում հոկտեմբերի 22-24-ը կայանալիք ԲՐԻԿՍ-ի գագաթնաժողովին մասնակցելու հրավերը։

ԲՐԻԿՍ-ի հիմնադիր երկրներն են Բրազիլիան, Ռուսաստանը, Հնդկաստանը, Չինաստանն ու Հարավաֆրիկյան Հանրապետությունը։ Ներկայում կազմակերպության անդամ է 9 պետություն՝ Բրազիլիա, Ռուսաստան, Հնդկաստան, Չինաստան, Հարավաֆրիկյան Հանրապետություն, Եգիպտոս, Իրան, Եթովպիա և Արաբական Միացյալ Էմիրություններ։

Էմմա Չոբանյան