09.09.2026 | 16:49
Ադրբեջանի և Հայաստանի արտգործնախարարների առաջիկա հանդիպման շուրջ պայմանավորվածություն կա․ խոսնակ
Լեհաստանում դատարանը հեռակա կարգով ձերբակալել է Բելառուսի երեք քաղաքացու՝ Մինսկում Ryanair-ի ինքնաթիռի հարկադիր վայրէջքի գործով
Քաղաքականություն
06.09.2024 | 20:14
Վարշավայի դատարանը հեռակա կարգով ձերբակալել է «Բելաերոնավիգացիայի» նախկին տնօրեն Լեոնիդ Չուրոյին, հերթափոխի հսկիչ Եվգենի Ցիգանովին և Պետական անվտանգության կոմիտեի (ՊԱԿ) անանուն սպային՝ Մինսկում Ryanair ինքնաթիռի հարկադիր վայրէջքի գործով, որում եղել է Ռոման Պրոտասևիչը, հայտնում է Wyborcza-ն։
Նրանց մեղադրանք է առաջադրվել Լեհաստանի Քրեական օրենսգրքի 166-րդ հոդվածի 1-ին մասով (ջրային տրանսպորտի կամ օդանավի գրավում) և 189-րդ հոդվածի 1-ին մասով (ազատությունից ապօրինի զրկելը):
Հաղորդվում է, որ 42-ամյա կարգավարը, որը Բելառուսից Լեհաստան է փախել 2021 թվականի ամռանը, օգնել է պարզել դեպքի հանգամանքները։ Նա պատմել է, որ ինքնաթիռի հետ տեղի ունեցած միջադեպի պահին կառավարման սենյակում եղել է ՊԱԿ-ի աշխատակիցը։ Նրա խոսքով՝ վճռական պահին սպան «հսկողության տակ է վերցրել դիսպետչերական ծառայությունը և ամբողջ ընթացքում անընդհատ հեռախոսով շփվել է ինչ-որ մեկի հետ՝ զեկուցելով իրավիճակը»։
Հիշեցնենք՝ 2021 թվականի մայիսի 23-ին Բելառուսի օդային տարածքում երկրի ռազմաօդային ուժերը, հայտարարելով, թե ինքնաթիռում տեղադրված ռումբի մասին տեղեկություն են ստացել, ստիպել են Աթենք-Վիլնյուս կանոնավոր չվերթն իրականացնող Ryanair ավիաընկերության օդանավին վայրէջք կատարել Մինսկի միջազգային օդանավակայանում՝ ընդդիմադիր լրագրող և բլոգեր Ռոման Պրոտասևիչի ձերբակալության նպատակով։
Հունվարի սկզբին Քաղաքացիական ավիացիայի միջազգային կազմակերպությունը (ICAO) եզրակացրել է, որ Ryanair ավիաընկերության ինքնաթիռում ռումբի մասին հաղորդագրությունը, որն անձնակազմին ստիպել էր վայրէջք կատարել Մինսկում անցյալ տարվա մայիսին, կեղծ է եղել:
