Թրամփը և Հարրիսը պայմանավորվել են հեռուստաբանավեճերի կանոնների շուրջ

Ամերիկյան ABC հեռուստաալիքը, որը հաջորդ երեքշաբթի կհեռարձակի նախընտրական բանավեճը, հաղորդում է, որ երկու թեկնածուները՝ Քամալա Հարրիսը և Դոնալդ Թրամփը, պայմանավորվել են, որ բանավիճողների խոսափողները միացվեն հերթով, այլ ոչ միաժամանակ, փոխանցում է BBC-ի ռուսական ծառայությունը։

Սրանք այն կանոններն էին, որոնք օգտագործվել են հունիսի վերջին CNN-ի բանավեճի ժամանակ, որի ընթացքում նախագահ Ջո Բայդենի ելույթն այնքան անհաջող համարվեց, որ դեմոկրատները դրանից հետո իրենց թեկնածու առաջադրեցին ԱՄՆ գործող փոխնախագահ Քամալա Հարրիսին:

Այնուամենայնիվ, անցյալ շաբաթ տեղեկություններ տարածվեցին, որ Հարրիսի նախընտրական շտաբը հեռուստաալիքի ղեկավարությանը խնդրել է չանջատել հակառակորդների խոսափողները հեռարձակման ամբողջ ընթացքում: Սա թույլ կտար երկու թեկնածուներին ընդհատել միմյանց և խոսել միաժամանակ՝ խլացնելով հակառակորդի ձայնը:

«Փոխնախագահը պատրաստ է իրական ժամանակում բախվել Թրամփի մշտական ստերի և ընդհատումների հետ։ Դադարեցրեք թաքնվել անջատման կոճակի հետևում», – այն ժամանակ ասել էր Հարրիսի քարոզարշավի հաղորդակցության հարցերով ավագ խորհրդական Բրայան Ֆելոնը:

Թրամփը պատասխանել էր՝ մրցակցին մեղադրելով իր բանավեճից խուսափելու փորձի մեջ։

«Իրականում, նա պարզապես փորձում է շեղվել, քանի որ չի ցանկանում բանավիճել: Նա բանավեճեր վարել չգիտի»,- ասել էր նախկին նախագահը։

Ի վերջո, հաղորդավարի առաջարկած կանոնները համաձայնեցվել են երկու թեկնածուների նախընտրական շտաբերի ղեկավարների կողմից։